AQSh Kongressida Trampga impichment e’lon qilish masalasi ko‘tarildi

AQSh Kongressi Vakillar palatasi a’zosi El Grin prezident Donald Trampning impichmentini muhokama qilish masalasini ko‘tardi. Politico’ning yozishicha, siyosatchi bu haqda qonunchilik organi yig‘ilishida ma’lum qilgan.

«Prezident Trampga impichment e’lon qilish ustida ishlar allaqachon boshlangan. Shuni ma’lum qilamanki, men razil va qabih takliflari uchun unga qarshi impichment to‘g‘risidagi qonun loyihasini kiritaman», — deydi kongressmen.

Grinning fikricha, Tramp yaqinda G‘azo sektori bo‘yicha bildirgan bayonoti uchun hokimiyatdan chetlatilishga loyiq.

Donald Tramp Isroil bosh vaziri Binyamin Netanyahu bilan muzokaralar davomida G‘azo sektori aholisini Misr va Iordaniyaga ko‘chirishni taklif qildi. «Qo‘shma Shtatlar G‘azo sektorini nazorat qiladi, biz u bilan ishlaymiz. Biz unga egalik qilamiz va u yerdagi barcha xavfli portlamagan bombalar va boshqa qurollarni demontaj qilish uchun javobgar bo‘lamiz», — dedi Oq uy rahbari.

Eslatib o‘tamiz, Donald Trampga nisbatan birinchi prezidentlik muddatida ham impichment jarayonlari boshlangan edi. Birinchi impichment 2019 yil dekabrida e’lon qilingan. O‘shanda kongressmenlar Trampni hokimiyatni suiiste’mol qilish va Kongress o‘tkazgan tergovga to‘sqinlik qilishda ayblagan. Biroq Senat impichmentga qarshi ovoz bergan.

2021 yil yanvarda esa AQSh Senati Donald Trampni Kapitoliyga hujum uyushtirilishi tufayli boshlangan impichment jarayonida qoralash uchun zarur bo‘lgan ovozni yig‘a olmagandi.