Keniyadagi qishloqqa osmondan yarim tonnalik metall halqa qulab tushdi

Nayrobidan 120 kilometr janubi-sharqda joylashgan Mukuku qishlog‘iga diametri 2,5 metrga yetadigan metall halqa qulab tushdi. Keniya kosmik agentligi bu tashuvchi raketaning bir qismi bo‘lishi mumkinligini taxmin qilmoqda.

Keniya poytaxti Nayrobidan 120 kilometr janubi-sharqda joylashgan Mukuku qishlog‘iga 30 dekabr kuni osmondan diametri 2,5 metrga, og‘irligi esa yarim tonnaga yaqin metall halqa qulab tushdi. Bu haqda Keniya kosmik agentligi xabar berdi.

Dastlabki ma’lumotlarga ko‘ra, qulab tushgan metall bo‘lagi tashuvchi raketaning ajratuvchi halqasiga o‘xshab ketadi. «Bunday obektlar odatda Yer atmosferasiga kirishda yonib ketishga yoki okean kabi kimsasiz hududlarga tushishga mo‘ljallangan», — deyiladi agentlik xabarida. Agentlik halqaning qulashini «yagona hodisa» deb atab, uni xalqaro kosmik huquqlar doirasida tergov qiladi.

Guvohlardan birining aytishicha, u sigiriga qarayotganida gumburlash ovozini eshitgan, shundan keyin qishloqning boshqa aholisi ham «osmondan sekin qulayotgan» qizil rangli ulkan halqasimon obektni ko‘rgan. Halqa yerga tushgach sovib, kulrang bo‘lib qolgan.

Halqaning qulashi oqibatida mahalliy aholiga zarar yetmagan. Keniya kosmik agentligi ushbu obekt xavf tug‘dirmasligi va o‘rganib chiqilishini ma’lum qildi.

2024 yilda Yevropa kosmik agentligi Yerning quyi orbitasida 14 ming tonnadan ziyod materiallar borligi, ularning uchdan bir qismi — kosmik chiqindilar ekanini ma’lum qilgandi. Har yili yangi parvozlar amalga oshirilishi hisobiga ushbu chiqindilar hajmi ortib boradi.

#Keniya #kosmos