«Milliy PR-markazi» direktori tadbirkorlik faoliyati bilan shug‘ullangani aniqlandi 

Turizm qo‘mitasi huzuridagi «Milliy PR-markazi» davlat unitar korxonasi direktori D.Samandarova tadbirkorlik faoliyati bilan shug‘ullangan. Jumladan, u Avtoimkon Trade MChJ ta’sischilaridan biri bo‘lgan.  

Qayd qilinishicha, 20 sentabr kuni Korrupsiyaga qarshi kurashish agentligi tomonidan Turizm qo‘mitasiga ushbu holatga taalluqli taqdimnoma kelib tushgan. Unda D.Samandarovaning Avtoimkon Trade MChJ ta’sischiligidagi faoliyatini tugatish, tadbirkorlik faoliyati bilan shug‘ullanmaslik va kelgusida shu kabi holatlarga yo‘l qo‘ymaslik haqida rasman ogohlantirish o‘tkazish va tushuntirish ishlari olib borish choralarini ko‘rish so‘ralgan. 

Taqdimnomaga binoan Turizm qo‘mitasi ishchi guruh tuzgani va xizmat tekshiruvi olib borilayotganini ma’lum qildi. 

Vazirlar Mahkamasining 1992 yil 6 martdagi «Tadbirkorlik faoliyati bilan shug‘ullanish taqiqlangan mansabdor shaxslarning ro‘yxati to‘g‘risida»gi qaroriga asosan davlat hokimiyati va boshqaruv organlarining, huquqni muhofaza qilish organlarining xodimlariga tadbirkorlik faoliyati bilan shug‘ullanishi taqiqlangan. 

Shu bilan birga, «Tadbirkorlik faoliyati erkinligining kafolatlari to‘g‘risida»gi qonunning 4-moddasiga asosan davlat organlari (qonun hujjatlarida nazarda tutilgan hollar bundan mustasno), ularning mansabdor shaxslari, shuningdek, tadbirkorlik faoliyati bilan shug‘ullanishi qonunchilikda man etilgan boshqa shaxslar tadbirkorlik faoliyati sub’yektlari bo‘lishi mumkin emas. 

Shuningdek, «Davlat fuqarolik xizmati to‘g‘risida»gi qonunga ko‘ra, davlat fuqarolik xizmatchisi tadbirkorlik faoliyati sub’yektlarini tashkil etishga, ularning muassisi (ishtirokchisi) bo‘lishga, tadbirkorlik faoliyati sub’yektida tashkiliy-boshqaruv, ma’muriy-xo‘jalik vazifalarini bajarishga haqli emas.