Foto: Mudofaa vazirligining tibbiy otryadi Turkiyadan qaytdi

Mudofaa vazirligining Turkiyada 24 kun davomida zilzila oqibatlarini bartaraf etishda ishtirok etgan harbiy xizmatchilari Toshkentga qaytib keldi. Ular 4 mingga yaqin kishiga tibbiy yordam ko‘rsatgan.

Foto: Mudofaa vazirligi

Turkiyada 24 kun davomida zilzila oqibatlarini bartaraf etishda ishtirok etgan O‘zbekiston Mudofaa vazirligining malakali harbiy xizmatchilari 6 mart kuni Toshkentga qaytib keldi.

Toshkent xalqaro aeroportida ularni ommaviy axborot vositalari, keng jamoatchilik vakillari, mudofaa vazirining o‘rinbosari va boshqa rasmiylar kutib oldi.

Shavkat Mirziyoyev topshirig‘i bilan 8 fevral kuni jo‘nab ketgan harbiy xizmatchilaridan iborat tibbiy otryad jami 3860 nafar fuqaroga tibbiy yordam ko‘rsatgan. Ulardan 1795 nafari erkaklar, 1177 nafari ayollar va 888 nafarini esa bolalar tashkil etadi.