Madaniy boyliklarni auksionga qo‘yishga aloqador ma'muriy reglament tasdiqlanadi 

Vazirlar Mahkamasining “Madaniyat sohasida ayrim davlat xizmatini ko‘rsatishning ma'muriy reglamentini tasdiqlash to‘g‘risida”gi qarori loyihasi e'lon qilindi.

Qayd etilishicha, prezidentning “Raqamli O‘zbekiston – 2030” strategiyasini tasdiqlash va uni samarali amalga oshirish chora-tadbirlari to‘g‘risida”gi farmoni 21-ilovasida tasdiqlangan "Raqamli O‘zbekiston – 2030" strategiyasi doirasida 2020-2022 yillarda ta'lim, sog‘liqni saqlash, madaniyat, yoshlar, ma'naviyat va jamoat tashkilotlari, mahalla va oilani qo‘llab-quvvatlash sohalarini raqamli transformatsiya qilish dasturining 32-bandida davlat xizmatlari ko‘rsatish bo‘yicha ma'muriy reglament ishlab chiqish va tasdiqlash vazifalari belgilangan.

Ta'kidlanishicha, qaror loyihasining qabul qilinishi budjetdan qo‘shimcha moliyaviy mablag‘lar talab qilmaydi.

Mazkur qaror loyihasi bilan madaniy boyliklarni ochiq savdoga (auksionga) taqdim etishni kelishish bo‘yicha davlat xizmati ko‘rsatishning ma'muriy reglamenti tasdiqlanmoqda.

Ushbu qaror loyihasining belgilangan tartibda qabul qilinishi natijasida:

• madaniy boyliklarni ochiq savdoga (auksionga) taqdim etishni kelishish bo‘yicha davlat xizmati ko‘rsatilishi elektron (onlayn) shaklga o‘tkaziladi
• mazkur davlat xizmati Yagona interaktiv davlat xizmatlari portali hamda Davlat xizmatlari markazlari orqali amalga oshiriladi;
• mazkur davlat xizmati elektron shaklga o‘tkazilishi bilan ruxsat berishga oid jarayonda inson omilini kamaytirishga, davlat xizmati ko‘rsatilishida shaffoflikni oshirish, aholi va tadbirkorlik sub'yektlariga qulaylik yaratilishiga erishiladi;
• mazkur davlat xizmatini tartibga soluvchi normativ-huquqiy hujjatlar muvofiqlashtiriladi.