Yaqin orada AQShda tarixdagi muhim qurol paydo bo‘ladi – Tramp

Crew Dragon kemasi Falcon 9 raketasida Toshkent vaqti bilan 31 mayga o‘tar kechasi Floridadagi kosmodromdan uchirildi.

Tramp va vitse-prezident Mayk Pens raketa uchirilishini bevosita voqea joyidan kuzatishdi. Shu bilan birga, AQSh prezidenti va Mask Kennedi nomidagi koinot markazida nimalar haqida gaplashganlarini eshitishning iloji bo‘lmagan. 

AQSh prezidenti raketa uchirilgandan keyin chiqish qilib, astronavtlar kemada o‘zlarini yaxshi his qilishayotganini aytgan.

“Men Crew Dragon kapsulasi past orbitaga yetgani va astronavtlarimiz o‘zlarini ajoyib his qilayotganlarini ma'lum qilishdan xursandman”, deb aytgan Tramp o‘z nutqida.
 
Shuningdek, u yaqin orada AQShda tarixdagi “muhim qurol” paydo bo‘lishini aytgan. 

“Yaqinda biz Marsda qo‘namiz va bizda tarixdagi muhim qurol bo‘ladi. Men ishlanmalarni ko‘rdim, hattoki men ham bunga ishona olmayman”, deb ta'kidlab o‘tgan Tramp.

Shu bilan birga u tafsilotlarni keltirmagan.

Avvalroq Tramp AQSh dunyodagi eng tezkor “super-puper” raketani ishlab chiqayotganini ma'lum qilgandi. Uning ta'kidlashicha, ushbu raketa dunyodagi mavjud eng tez raketalardan 17 marta tezroq bo‘ladi.