«​Zo‘rladi, o‘ldirdi, bo‘g‘di». ​Biz qanday axborot iste'mol qilyapmiz?

Kun.uz saytida e'lon qilingan «Oq va qora» ko‘rsatuvining navbatdagi soni tayyorlandi. Ko‘rsatuvning bu galgi sonida mustaqil terrolog-analitik Said-Abdulaziz Yusupov jamiyatda ko‘zga ko‘rinmay rivojlanib borayotgan, ayni paytda o‘ta dolzarb bo‘lgan mavzuga murojaat qilmoqda. Muallif yoshlarning jinoyatchilikka qo‘l urishi, ijtimoiy befarqlikning ortib borishiga sabab bo‘layotgan omillarni sanab o‘tadi.

«Yoshlarning ma'naviy darajasini yuksaltirishda, albatta, davlat qo‘lidan ishni bajaryapti. Bugun yoshlarimiz orasida jinoyatchilikka qo‘l urayotgan, noto‘g‘ri aqidaparastlikka kirib ketayotganlar mavjud. Va bu - real ijtimoiy holatda yuzaga kelmoqda. Buni yuzaga keltirayotgan omillardan biri esa OAV, ularning yoshlar ongiga, qalbiga ta'sir masalasi ham kelib chiqadi», – deydi Said-Abdulaziz Yusupov.

Mavzuga oid: Buyuk kelajakning iztiroblari bugun chekiladi

«​Xo‘sh, bugun O‘zbekiston kelajagi bo‘lgan O‘zbekiston yoshlarining ma'naviyatini oshirishda ommaviy axborot vositalari, ayniqsa ommaviy media sohasidagi xususiy sektor ma'naviy yuksalishga o‘z ulushini qo‘shyaptimi? Yoki tamomila aksini bajarmoqdami? Bugun, yana bitta katta muammolardan bittasi - har kuni radioda, televideniyeda, internet saytlarda jinoyatlar haqidagi ma'lumotlarning ko‘payib ketayotgani - meni shaxsan tashvishga solyapti»​, – so‘zlarida davom etadi tahlilchi.

Sababi shundaki, har kuni internet saytlarda kamida 2-3ta qotillik, og‘ir jinoyatlar haqida xabar paydo bo‘ladi. Salbiy informatsiyaning axborot makonida ko‘payishi xavflimi? Yoshlarning befarqligi, ijtimoiy ojizligi ortida yangiliklarning saralanmagani, salbiy informatsiyalar ortidan quvish turadimi?