O‘zbekistonning Orxus konvensiyasiga qo‘shilishi to‘g‘risidagi qonun imzolandi

O‘zbekiston Atrof-muhit bilan bog‘liq bo‘lgan masalalar bo‘yicha qarorlar qabul qilish jarayonida jamoatchilikning axborot olish imkoniyati, ishtiroki va odil sudlovga erishish imkoniyati to‘g‘risidagi konvensiyaga qo‘shilmoqda.

Konvensiya fuqarolarga atrof-muhit holati bilan bog‘liq ma’lumotlardan foydalanish huquqini kafolatlaydi. Uning qoidalari davlatlardan jamoatchilikning ekologik qarorlar qabul qilish jarayonlarida, shu jumladan atrof-muhitga ta’sirni baholash, rejalar, dasturlar va tabiatga sezilarli ta’sir ko‘rsatadigan boshqa harakatlarda ishtirok etish mexanizmlarini ta’minlashni talab qiladi.

Shuningdek, xalqaro hujjat fuqarolarga ularning axborot olish yoki qaror qabul qilishda ishtirok etish huquqlari buzilgan taqdirda odil sudlovdan foydalanishni ta’minlaydi. Ya’ni, fuqarolar o‘z huquqlarini himoya qilish uchun sud yoki boshqa vakolatli organlarga murojaat qilishlari mumkin.