Муз кўчкиси Алп тоғларидаги қишлоқни яксон қилди. Табиий офатдан олдинги ва кейинги суратлар

28 май куни Швейцариянинг Вале кантонида муз кўчиши оқибатида Блаттен қишлоғи вайрон бўлди.

Вале кантони хавфсизлик хизмати раҳбари Стефан Ганзернинг таъкидлашича, қишлоқнинг 90 фоизга яқин қисми муз бўлаклари, лой ва тошлар остида қолган ёки вайрон бўлган. Кўчки, шунингдек, Лонца дарёси ўзанини ҳам тўсиб қўйган.

Лётчентал водийсида тош кўчиши 14 май куниёқ бошланганди, вазият ёмонлашишда давом этди ва 17 май куни расмийлар Блаттенда эвакуация эълон қилди.

Маҳаллий аҳоли вакиллари бўлган 92 киши ва 16 сайёҳ қишлоқни тарк этган. Аҳолини Блаттендан кўчириш бўйича ўз вақтида қабул қилинган қарор ўнлаб кишилар ҳаётини сақлаб қолди. Шунга қарамай, Associated Press нашри ёзишича, Блаттенга муз кўчиб тушиши оқибатида 64 ёшли эркак бедарак йўқолган деб ҳисобланмоқда.

Вале кантонида музлик кўчишигача ҳам фавқулодда ҳолат режими жорий этилганди, бу эса ҳодиса оқибатларини бартараф этиш учун тезкор равишда ресурслар жалб этиш имконини берди, жумладан, армия ёрдамга чақирилган.

 Атроф-муҳит, транспорт, энергетика ва коммуникациялар бўйича федерал департамент раҳбари Алберт Рёшти тоғли ҳудудлар аҳолиси доимо дуч келиши мумкин бўлган хавф-хатарларни англаган ҳолда ҳаёт кечиришини таъкидлаган. «Табиат инсондан кучлироқ», – дея қайд этади у ва расмийлар қишлоқни тиклаш учун барча зарур ёрдамни кўрсатишига ишонтирган. Швейцария президенти Карин Келлер-Зуттер X ижтимоий тармоғида шундай деб ёзди: «Қадрдон уйни йўқотиш – даҳшат. Шу соатларда бутун хаёлим Блаттен аҳолисида».