Швейцарияда қўшнисининг мушугига овқат берган аёл суд қилинмоқда

Мушук ўз уйига умуман келмай қўйган. Шу боис унинг эгалари ҳайвонга мунтазам равишда овқат бериб келган аёл устидан шикоят қилган.

Фото: Keystone-SDA

Швейцарияда 68 ёшли аёл қўшнисининг мушугига овқат бергани учун суд қилинади. Мамлакат қонунларига кўра, ўзгаларнинг уй ҳайвонини мунтазам равишда боқиш жиноят ҳисобланади, деб ёзмоқда Swissinfo.

Қайд этилишича, аёл 10 ойга яқин доимий равишда қўшнисининг Лео лақабли мушугига овқат бериб келган ва уни ўз квартирасига олиб кирган. У ҳатто мушук мустақил равишда бемалол кириб-чиқиши учун махсус эшик ҳам ўрнаттирган.

Мушукнинг эгалари аёлдан бир неча бор унга овқат бермасликни сўраган. Аммо Лео ўз уйига кам келишни давом этган, кейинчалик эса умуман келмай қўйган. Шу боис ҳайвоннинг эгалари аёлни ўз мушугини ноқонуний равишда эгаллаб олишда айблаган.

Цюрих прокуратураси нафақадаги аёлга нисбатан 3,6 минг Швейцария франки (4,3 минг доллар) миқдорида жарима белгилашни, шунингдек, қўшимча 800 франк ундиришни сўраган. Аёл идора қарорига рози бўлмаган ва иш судга оширилган.

Швейцарияда ҳайвонлар шахсий мулк сифатида эътироф этилади. Шунинг учун ўзгаларнинг уй ҳайвонларини мунтазам озиқлантириш мумкин эмас, акс ҳолда жарима ёки бошқа жазога тортилиш мумкин.

#Швейцария #мушук