Канадада ўрмон ёнғинлари минглаб гектар майдонни эгаллади

Хавф юқори бўлган ҳудудлардан 17 мингга яқин одам эвакуация қилинган. 30 кун давомида фавқулодда ҳолат режими амалда бўлади.

Фото: Government of Manitoba

Канаданинг Манитоба провинциясида ўрмон ёнғинлари ўн минглаб гектар майдонни қамраб олди. Маҳаллий ҳукумат 17 мингдан зиёд аҳолини эвакуация қилди, деб хабар беради CБC.

Манитобада ўрмон ёнғинларининг 22 та йирик ўчоғи қайд этилган. Улардан бири Манитоба ва Саскачеван провинциялари чегарасидаги Флин-Флон шаҳрига яқин жойлашган бўлиб, қарийб 20 минг гектар ҳудудни эгаллаган.

Расмий маълумотларга кўра, йил бошидан бери провинцияда 102-ёнғин кузатилмоқда — бу 20 йил давомидаги ўртача кўрсаткичдан сезиларли даражада юқори. Иссиқ ва шамолли об-ҳаво вазиятни янада қийинлаштирмоқда.

Маҳаллий ҳукумат бутун Манитоба ҳудудида фавқулодда ҳолат эълон қилган. Хавф юқори бўлган ҳудудлардан 17 мингга яқин одам эвакуация қилинган. Сўнгги марта бу қадар кенг кўламли эвакуация салкам 30 йил олдин амалга оширилган — 1997 йилда 25 минг киши сув тошқинлари сабаб ўз уйларини тарк этишга мажбур бўлганди.

Флин-Флон шаҳри ҳукумати маҳаллий аҳолини ярим тунга қадар уйларини тарк этишга чақирди. Бошқа аҳоли пунктлари ҳам хавф остида қолмоқда. Кросс-Лейк ҳудудида ёнғин 1,5 минг гектарни қамраб олган ва магистрал йўлга чиқишни блоклаган.

Ёнғинларни ўчиришга Канаданинг бошқа ҳудудларида, жумладан, Алберта, Британия Колумбияси, Шаҳзода Эдуард ороллари ва Ню-Брунсвикдан ҳам кучлар жалб этилган. Ҳозирча фавқулодда ҳолат 30 кунга эълон қилинган, зарурат туғилса, у яна узайтирилиши мумкин.

#Канада #ўрмон ёнғинлари