Канада Чубайс ва Путиннинг собиқ хотинига қарши санкциялар киритди

Канада Украинадаги уруш учун Россияга нисбатан жорий қилинган санкцияларни кенгайтирди. Канада ҳукумати сайтида 17 июн, сешанба куни кечқурун эълон қилинган хабарга кўра, энди жарима рўйхатига яна 77 жисмоний ва 39 юридик шахс, шунингдек, Россиянинг «соядаги флоти» деб аталувчи 201 та кема киритилган.

Қора рўйхатга «Роснано» корпорациясининг собиқ раҳбари, президент маъмурияти собиқ раҳбари ва бош вазирнинг биринчи ўринбосари Анатолий Чубайс, Россия собиқ президенти Борис Елциннинг қизи Татяна Юмашева, унинг турмуш ўртоғи, президент маъмуриятининг собиқ раҳбари Валентин Юмашев, шунингдек, Россиянинг амалдаги президенти Владимир Путиннинг собиқ рафиқаси Людмила Очеретная киритилган.

Санкцияга тушганлар орасида Людмила Очеретнаянинг турмуш ўртоғи Артур Очеретний, Владимир Путиннинг қариндошлари Михаил Путин ва Михаил Шеломов, Россия президентининг яқин атрофидаги бир қанча бошқа шахслар, йирик тадбиркорлар, жумладан Владимир Евтушенков, Владимир Лисин ва Александр Мамут ҳам бор.