Жаҳон | 01:29 / 18.06.2025
6752
2 дақиқада ўқилади

Канада Путиннинг собиқ рафиқасига санкциялар жорий қилди

Людмила Очеретная ва унинг эри Артур Очеретний Канада санкциялари рўйхатига киритилди.

Фото: woman.ru

Канада бош вазири Марк Карни «Катта еттилик» (G7) саммити якунлари бўйича россиялик жисмоний ва юридик шахсларга, шунингдек, белгиланган чегарадан юқори нархларда нефт ташувчи 200 дан ортиқ «махфий флот» кемаларига қарши янги санкцияларни эълон қилди.

Санкциялар рўйхатига Россия президенти Владимир Путиннинг собиқ хотини Людмила Очеретная ва унинг эри Артур Очеретний ҳам киритилди. 

Шунингдек, 70 нафардан ортиқ киши киритилган рўйхатда қуйидаги номлар бор:

- дирижёр Валерий Гергиев;

- Путиннинг жияни Михаил Шеломов;

- Борис Елциннинг қизи Татяна Юмашева ва унинг эри Валентин Юмашев;

- «Роснано» собиқ раҳбари Анатолий Чубаис;

- InfoWatch бош директори Наталя Касперская;

- Австрия ташқи ишлар вазирлигининг собиқ раҳбари Карин Кнайсл;

- Nord Stream - 2 собиқ директори Маттиас Варниг;

- бадиий гимнастика бўйича Россия миллий терма жамоасининг собиқ бош мураббийи Ирина Винер.

Канада ташқи ишлар вазири Анита Ананд офиси баёнотида бу «Россия 2022 йил февралида Украинага кенг кўламли босқинни бошлаганидан бери Канаданинг энг муҳим санкция эълонларидан бири» экани айтилган. 

Россия президенти Владимир Путин рафиқаси Людмила билан қарийб 30 йиллик никоҳдан кейин 2014 йилда ажрашди. Кейинчалик аёл тадбиркор Артур Очеретний билан турмуш қурди ва унинг фамилиясини олди.

Мавзуга оид