Трамп АҚШ олийгоҳларига чет эллик барча талабалар қабулини тўхтатади

Президент маъмурияти потенциал абитуриентлар текширувини кучайтирмоқда. Хусусан, энди уларнинг ижтимоий тармоқлардаги аккаунтлари ҳам кўздан кечирилади.

Фото: Reuters

Доналд Трамп маъмурияти АҚШда ўқиш ниятида бўлган чет эллик барча талабаларга янги талаблар жорий этишга тайёрланмоқда. Politico маълумотларига кўра, президент потенциал абитуриентлар текширувини кучайтирмоқчи, хусусан, уларнинг ижтимоий тармоқлардаги аккаунтлари ҳам кўздан кечирилади.

Қайд этилишича, АҚШ президенти маъмурияти янги текширув шаклига тайёргарлик доирасида мамлакат элчихоналари ва консулликларига талабалар визасини бериш учун янги суҳбатлар белгилашни тўхтатишни буюрди.

Талабалар текширувини кучайтириш тўғрисидаги қарор Доналд Трампнинг Ҳарвард университети маъмурияти билан бир неча ойдан бери давом этиб келаётган можароси фонида юз бермоқда. 22 май куни президент Ҳарвардга чет эллик талабаларни ўқишга қабул қилишни тақиқлаб қўйганди. Бунга таълим муассасаси раҳбарияти Ғазо секторида Исроил операцияси бошланганидан бери Фаластинни қўллаб-қувватловчи акциялар ОТМ ҳудудида ўтказилишига йўл қўйиб бераётгани сабаб бўлган.

Эслатиб ўтамиз, 14 апрел куни АҚШ федерал ҳукумати Ҳарвард университетига 2,2 миллиард доллардан ортиқ грантлар ва 60 миллион долларлик шартномаларни музлатиб қўйгани маълум бўлганди.

#АҚШ #Доналд Трамп #талабалар