Трамп АҚШ энди «демократияни куч билан ўрнатмаслиги»га ваъда берди

АҚШ армияси энди қурол ёрдамида «демократия ўрнатишга уринмайди», деди президент Доналд Трамп Вест-Пойнт ҳарбий академиясида сўзлаган нутқида.

«АҚШ армиясининг вазифаси <...> бутун дунёда демократияни қурол кучи билан ўрнатиш эмас. Унинг вазифаси ҳар қандай душмандан устунлик қилиш ва Америка учун ҳар қандай таҳдидни, исталган вақтда, исталган жойда йўқ қилишдир. Бу миссиянинг муҳим қисми – яна ҳурмат қозонишдир. Ва энди сизларни дунёдаги бошқа армиялардан кўра кўпроқ ҳурмат қилишмоқда», деди у академия битирувчилари олдида.

Президентнинг айтишича, сиёсатчилар йигирма йил давомида армияни «сиёсий можароларга» тортиб келган. Ҳарбийлар АҚШ билан алоқаси йўқ мамлакатларга «давлат қуриш учун» юборилган ва жангчилар бу нима учун керак, деб сўраган.

«Ҳаммаси тугади. Буларнинг барчаси ниҳоясига етганини биласиз», деб таъкидлади Трамп.

Президент академия битирувчилари дунёдаги «энг кучли ва буюк армия» офицерлари бўлишини таъкидлади. У АҚШ ҳозир «олтин аср» даврида эканини айтди.

Трамп аввалроқ, Қўшма Штатларнинг 2000-йилларда Ироқ ва Афғонистонга бостириб кириш ҳақидаги қарорларини танқид қилган эди. Америка қўшинларининг Ироққа киритилиши ҳақида гапирар экан, у буни АҚШ тарихидаги «энг ёмон қарор» деб атади.

Трамп 2001 йил 11 сентябрдаги терактларга жавоб бўлган Афғонистондаги уруш ҳақида турлича фикр билдирган, бироқ 2015 йилда ядровий қуролга эга Покистон бу давлат билан ёнма-ён тургани учун буни хато деб ҳисобламаслигини айтган. Бироқ Трамп ўзидан олдинги президент Жо Байден 20 йилдан сўнг, 2021 йилда Афғонистондан қўшинларни олиб чиқиш масаласини қандай ҳал этганини танқид қилган. «Бу мамлакатимиз тарихидаги энг шармандали давр», деган эди Трамп.