Қамоққа олинган шахсни ҳибсхонада мажбурий тиббий кўрикдан ўтказиш ҳақидаги қонун имзоланди

Бу қамоққа олинган шахсларга нисбатан қийноққа солиш ҳолатларининг олди олинишга қаратилгани таъкидланмоқда.

Фото: Getty images

«Жиноят ишини юритиш чоғида қамоқда сақлаш тўғрисида»ги қонунга қўшимча киритилди.

Унга кўра, қамоққа олинганлар тергов ҳибсхонасига жойлаштирилишидан олдин ҳибсхонанинг ўзида мажбурий тиббий кўрикдан ўтказилади.

Мажбурий тиббий кўрик қамоққа олинганлар тергов ҳибсхонасига келтирилган пайтдан эътиборан 2 соат ичида ўтказилади.

Бунда қамоққа олинганнинг розилиги билан унинг адвокати ҳам иштирок этиши мумкин.

Мажбурий тиббий кўрикдан ўтказиш натижалари бўйича белгиланган намунадаги тиббий маълумотнома расмийлаштирилади.

Тиббий кўрик чоғида қамоққа олинганнинг танасида жароҳат, шикастланиш ва яралар аниқланганда, улар белгиланган тартибда қайд этилиб, бу ҳақда қамоққа олинганга маълум қилинади ва зудлик билан прокурорга хабар берилади.

#тиббий кўрик #қийноқ #Қамоқ