Эрдўған: Трамп Туркияда Путин билан учрашишга тайёр

Доналд Трамп Украина бўйича тинчлик музокараларини ўтказиш учун Истанбул ёки Анқарага келади, агар Владимир Путин ҳам келса. Бу ҳақда Туркия президенти Ражаб Тоййиб Эрдўған НАТО саммити бўлиб ўтган Ҳаагадан қайтгач, самолёт бортида журналистларга маълум қилди, деб хабар берди Туркиянинг TRT Haber телеканали 26 июн, пайшанба куни. «Бизнинг фикримизча, Россия ва Украина ўртасидаги урушда тинчлик ўрнатилишига катта умид бор. Буни ҳал қилиш учун игна билан тешик қазишимиз керак бўлса ҳам, биз ўз мақсадимиз томон ҳаракат қиламиз. Юртимизда етакчилар даражасида учрашув ўтказишимиз мумкин ва узоқ кутилган тинчликни ўрнатамиз», деди Эрдўған.

Унга кўра, Ҳаагада у Доналд Трамп билан Оқ уй раҳбарининг Украина бўйича музокараларда иштирок этиш имкониятини муҳокама қилган. «Агар Россия президенти Владимир Путин Истанбул ёки Анқарага ечим топиш учун келса, мен ҳам Истанбул ёки Анқарага бораман», деган Эрдўғанга Америка президенти.

Ражаб Тоййиб Эрдўғаннинг фикрича, Россия ва Украина ўртасида аллақачон Истанбулда бўлиб ўтган музокаралар «тинчлик эшигини очган». «Ҳамма тинчликдан воз кечса ҳам, биз буни қилмаймиз», деди у. Июн ойи бошида Туркия президенти Украина етакчиси Володимир Зеленский, Владимир Путин ва Доналд Трамп ўртасидаги учрашувни ташкил этиш унинг «энг катта орзуси» эканини айтганди. Кремл бунга жавобан Путин бундай учрашувга тайёр, бироқ биринчи навбатда «икки давлат делегациялари ўртасидаги тўғридан тўғри музокаралар натижасига» эришиш керак, деб жавоб берди. Сўнгги бундай музокаралар 2 июн куни Истанбулда бўлиб ўтди.