Жаҳон | 08:24 / 20.05.2025
5700
2 дақиқада ўқилади

Зеленский қуролли кучларни Украина ҳудудларидан олиб чиқиш имкониятини рад этди

Украина президентининг сўзларига кўра, Трамп Путин билан суҳбатдан сўнг Кремль муроса қилишга тайёрлигига ишонч билдирмоқда ҳамда Киев ва Москва ўртасида тўғридан тўғри музокаралар олиб боришни талаб қилмоқда.

Фото: Ludovic Marin/REUTERS

Украина ўз ҳудудларидан қўшинларини олиб чиқмайди, деди мамлакат президенти Володимир Зеленский Доналд Трамп ва Владимир Путин ўртасидаги телефон суҳбатидан сўнг. «Агар Россия қўшинларимизни еримиздан олиб чиқиш учун шарт қўйса, бу улар уруш тугашини истамаяпти, дегани. Чунки улар Украина буни қилмаслигини аниқ тушунишади», — деди Зеленский 19 май, душанба куни кечки брифингда.

Володимир Зеленскийнинг сўзларига кўра, унинг конституциявий бурчи мамлакат мудофаасини давом эттиришдир. «Ультиматумлар бўлмайди, ҳеч ким ўз ерларини, ўз халқини, уйини ташлаб қўймайди», деб таъкидлади у.

Украина президенти, шунингдек, Трамп Россия муросага тайёр эканини айтганига эътибор қаратди. Оқ уй раҳбари учун энг муҳими, Киев ва Москва бевосита музокараларни бошлаши. Шу билан бирга, Зеленскийнинг ўзи урушни тугатиш йўлидаги биринчи қадам сифатида ўт очишни тўхтатишни кўришни хоҳлайди, чунки бу билан руслар тинч йўл орқали келишувга чинакам тайёр эканлигини намойиш этишлари мумкин эди.

Мавзуга оид