Telegram асосчиси Руминияда цензура жорий этишдан бош тортди

«Ғарбий Европа ҳукуматлари» Руминиядаги президентлик сайловлари олдидан Telegramʼдан «консерватив овозларни ўчиришни» сўради, деди Павел Дуров. У талабни бажаришни «қатъий рад этди».

Фото: Telegram / durov

Telegram асосчиси Павел Дуров Ғарбий Европа давлатларидан бирининг 18 май, якшанба куни президентлик сайловларининг иккинчи босқичи бўлиб ўтган Руминияда «консерватив овозларни ўчириш» ҳақидаги илтимосини рад этганини айтди.

«Ғарбий Европа ҳукумати (ўйлаб кўринг, қайси бири) бугунги президентлик сайловлари олдидан Руминиядаги консерватив овозларни ўчиришни Telegramʼдан сўради. Мен қатъиян рад этдим. Telegram руминиялик фойдаланувчиларнинг эркинликларини чекламайди ва уларнинг сиёсий каналларини блокламайди», — деб ёзди мессенжер яратувчиси ўзининг Telegram-каналида.

Дуров қайси ҳукумат ҳақида гапираётганига аниқлик киритмади, бироқ «ўйлаб кўринг, қайси бири» сўзларини багет шаклидаги эмодзи билан тасвирлади, буни Францияга ишора сифатида талқин қилиш мумкин. Кейинчалик тадбиркорнинг айтишича, шу йилнинг баҳорида у Франция Ташқи разведка бош бошқармаси бошлиғи Николя Лернернинг «сайловлар олдидан Руминияда консерватив овозларни тақиқлаш» ҳақидаги илтимосини рад этган.

«Демократияни йўқ қилиш орқали «демократияни ҳимоя қилиш»мумкин эмас. Сайловларга аралашиш орқали «сайлов аралашувига қарши» кураша олмайсиз. Сизда сўз эркинлиги ва адолатли сайловлар ёки бор, ёки йўқ. Руминия халқи эса иккаласига ҳам муносиб», — дея таъкидлади у.

#Telegram #Руминия #Павел Дуров