Telegram'га Илон Маскнинг Grok сунъий интеллекти интеграция қилинади

Америкалик миллиардер Илон Маскка тегишли xAI компаниясининг Grok чатботи Telegram мессенжерига интеграция қилинади. Бу ҳақда Telegram асосчиси Павел Дуров маълум қилди.

«Бу ёзда Telegram фойдаланувчилари бозордаги энг илғор сунъий интеллект технологиясига эга бўладилар. Илон Маск ва мен 1 йиллик ҳамкорлик бўйича келишувга эришдик — бу орқали xAI компаниясининг Grok чатботи миллиарддан ортиқ фойдаланувчиларимизга тақдим этилади ва барча Telegram иловаларига интеграция қилинади», деб ёзди Дуров.

У ўз постига илова қилган видеода Grok ёрдамида мессенжерда саволларга жавоб топиш, постларни таҳрирлаш, хулоса ясаш, аватар ва эможилар яратиш мумкинлиги кўрсатилган.

«Бу Telegramʼнинг молиявий ҳолатини ҳам мустаҳкамлайди: биз xAI'дан нақд пул ва акциялар кўринишида 300 миллион доллар оламиз, шунингдек Telegram орқали сотилган xAI обуналаридан 50 фоиз даромад кўрамиз», деган Дуров.

Мессенжердаги Grok AI хизмати ёзда ишга тушади, аниқ санаси ва обуна нархи қанча бўлишини очиқламаган.

Павел Дуров, шунингдек, Telegramʼнинг пуллик обуначилари сони 15 миллиондан ортганини маълум қилди.

«Telegram Premium ҳозирда 15 миллиондан ортиқ пулли обуначига эга. Бу рақам атиги бир йил ичида икки баробарга ошди. Premium'га ўтганингиз учун раҳмат!» деб ёзди Дуров 28 май куни ўзининг каналида.

Маълумот учун, Telegram Premium обунасининг нархи расмий @PremiumBot орқали амалга оширилганда ойига 3,99 доллар. Тўлов App Store ёки Play Market орқали амалга оширилганда эса ойига 4,99 долларни ташкил қилади.

Ушбу обуналар, энг кам нархда ҳисоблаганда, компанияга ойига 59 млн доллардан кўпроқ даромад олиб келмоқда.

Telegram Premium 2022 йил 19 июн куни расмий равишда ишга туширилди. Premium обуна орқали фойдаланувчилар каттароқ ҳажмдаги файлларни юбориш, тезроқ юклаб олиш, рекламаларсиз интерфейс, овозли хабарларни матнга айлантириш ва таржима каби кўплаб имкониятларга эга бўлади. Шунингдек, мессенжердан бепул фойдаланувчиларда ҳам аввалги функциялар сақланиб қолган.

Telegram асосчиси Павел Дуров – Premium обунани жорий этиш орқали фойдаланувчиларга қўшимча имкониятлар тақдим этишни, шу билан бирга платформанинг молиявий барқарорлигини таъминлашни мақсад қилганини айтганди.

Унинг сўзларига кўра, агар барча фойдаланувчиларга чексиз имкониятлар берилса, сервер ва трафик харажатлари бошқариб бўлмас даражага етади. Шу сабабли, қўшимча функцияларни пулли обуна орқали тақдим этиш қарори қабул қилинган.

Telegram Ўзбекистонда ҳам энг оммабоп ва машҳур мулоқот воситаси, ахборот манбайига айланган. АОКА маълумотларига кўра, 2025 йилларда Ўзбекистонда Telegram фойдаланувчилари сони 28 миллиондан ошган. Бу – аҳолининг қарийб 75 фоизи демакдир.

2024 йилда Telegram илк марта даромадга чиқиб, крипто-активларни ҳисобга олмаганда йилни 500 млн доллардан ортиқ нақд пул захираси билан якунлаган. Дуров ўшанда компания охирги 4 йилда 2 миллиард долларга яқин қарзларини ёпганини айтган эди.

2025 йил март ойида Дуров Telegram'нинг доимий фойдаланувчилари сони 1 миллиарддан ошгани ҳамда ҳар бир фойдаланувчининг мессенжерда ўтказган вақти ҳам ошиб бораётганини қайд этганди.