Зеленский Римда Вэнс ва Рубио билан учрашув ўтказди 

Римда АҚШ вице-президенти Жей Ди Вэнс ва Украина президенти Володимир Зеленский ўртасида учрашув бўлиб ўтди. Томонлар Россия ва АҚШ президентларининг 19 май кунига режалаштирилган ўзаро телефон орқали мулоқотларини муҳокама қилди. Бу ҳақда украиналик юқори мартабали амалдорга таяниб, AFP хабар берди.

Америка вице-президенти пресс-пули журналистлари маълумотларига кўра, учрашув АҚШнинг Италиядаги элчисини қароргоҳида ёпиқ режимда ўтказилган. Унда давлат котиби Марко Рубио, Украина президенти офиси раҳбари Андрей Ермак ҳам иштирок этган. 

Қайд этилишича, Зеленский ва Вэнс томонлар агар ўт очишни тўхтатиш бўйича келишувга эриша олмаса, Россияга қарши санкциялар жорий этиш эҳтимоли тўғрисида гаплашган. Исми ошкор этилмаган амалдорнинг таъкидлашича, Украина томони урушни тугатишга уринмоқда. Суҳбат давомида Жей Ди Вэнс ва Володимир Зеленский, шунингдек, фронтдаги вазият масаласига ҳам тўхталиб ўтган.

Агентлик суҳбатдошининг сўзларига кўра, ўзаро мулоқот феврал ойида Оқ уйда бўлиб ўтган Трамп ва Вэнснинг Украина президенти билан тортишувига нисбатан яхши кечган.

28 феврал куни Овал кабинетда журналистлар қаршисида ўтказилган мулоқотда Зеленский АҚШ президенти Доналд Трамп ва вице-президент Жей Ди Вэнс билан тортишиб қолганди, шундан кейин Украина президенти Оқ уйни муддатидан олдин тарк этган, нодир металлар бўйича битим имзоланмай қолган эди.

Бугун, 18 май куни Ватиканда янги Рим папаси Лев XIV нинг лавозимга киришиш маросими бўлиб ўтди. Рим папасининг лавозимга киришиш маросимига хориж давлатлари ва диний конфессияларнинг 150 дан ортиқ делегациялари ташриф буюрди. Улар орасида Украина президенти, АҚШ вице-президенти ва давлат котиби, Италия бош вазири, Еврокомиссия раҳбари, Испания ва Белгия қироллари ҳам бор.