Алишер Қодиров мактабда болаларга “Катюша” ёдлатилгани ҳолати юзасидан Мактаб вазирлигидан изоҳ сўради

Яқинда 9 май санаси муносабати билан пойтахтнинг Чилонзор туманидаги 188-мактабда ўқитувчи дарс ўрнига ўқувчиларга “Катюша” ёдлатгани хабар қилинганди.

Олий Мажлис Қонунчилик палатаси депутати, Миллий тикланиш сиёсий партияси раиси Алишер Қодиров айни ҳолат юзасидан Мактабгача ва мактаб таълими вазирлиги изоҳ беришини сўради.

“Боғча ва мактабларда болаларнинг онгостига ўзлигимиз хўрланган совет даврига соғинч, аждодларимизни қирғин қилган империалистик рамзларга муҳаббатнинг сингдирилиши миллий таҳдид сифатида баҳоланиши зарур.

Ўзбекистондаги боғча ва мактаблар фарзандларимизни миллий ва умуминсоний қадриятлар асосида, ўзлигимизга меҳр ва садоқат билан тарбиялаш учун керак, ташқи пропаганда тарғиботи учун эмас”, – дейди у.

Шунингдек, Қодиров Ташқи ишлар вазирлигига “Россотрудничество” фаолиятини таҳлил қилиш ҳақида сўров юбормоқчилигини ҳам айтиб ўтган.

“Нон бериб қўлидан айрилган халқмиз, яхши ниятимиз суиистеъмол қилинишига йўл қўйилмаслиги керак”, – дея якунлаган у Telegram-каналида ёзган постини.

Эслатиб ўтамиз, 188-мактабдаги ҳолат юзасидан берилган расмий муносабатда “Катюша” ва “Смуглянка” қўшиқларини ёдлатгани тасдиқланмаган, рад ҳам этилмаган. Мактаб маъмурияти ўқитувчининг дарс маҳалида бундай тадбир ўтказиши мумкин эмаслиги ҳақида огоҳлантириш берган.

Бундан аввалги воқеада айни шу мактабда 6-синф ўқувчиси рус тили дарси вақтида ўқитувчидан дарсни шу тилда олиб боришни сўрагани сабаб калтакланганди.