Германия канцлери Украинага етказиладиган қурол-яроғларга оид маълумотларни махфийлаштирди

Германия ҳукумати Украинага кўрсатилаётган ҳарбий ёрдамларга оид батафсил маълумотларни эълон қилишни тўхтатади. Бу ҳақда канцлер Фридрих Мерц Киевга ташрифи вақтида маълум қилди.

«Менинг раҳбарлигим остида қурол-яроғ таъминоти, калибрлар, қуролланиш тизимларига оид баҳслар жамоатчилик эътиборидан четга олинади», — дейди у.

Reuters манбасига кўра, Украинага ҳарбий ёрдам бўйича маълумотлар яширилади, бу эса «стратегик ноаниқлик»ка эришиш ва Россиянинг урушда устунликка эга бўлишининг олдини олиш мақсадида амалга оширилади. Унинг айтишича, ҳукумат 2022 йил 21 июндан буён янгиланиб келган етказиб берилган қуроллар рўйхатини юритишни ҳам тўхтатади.

Киевда ўтказилган саммитда Мерцдан узоқ масофага мўлжалланган Taurus ракеталарини етказиб бериш ҳақида ҳам сўрашди, бу масала унинг сайловолди ваъдаларидан бири эди. Сиёсатчи аниқ жавоб бермади, бироқ бундай эҳтимолни истисно ҳам этмади. Сайловдан бироз олдин у бу қарор «ҳамкорлар билан келишилган ҳолда» қабул қилинишини айтганди.

6 май куни канцлер лавозимига киришган Мерц Германия Россия босқинига қарши курашда Украинани қўллаб-қувватлаш мажбуриятидан воз кечмаслигини таъкидлади. «Бу бизнинг умумий Европа манфаатларимизга дахлдор. Уруш нафақат Украина ҳудудий яхлитлигига, балки бутун Европа сиёсий тартибига ҳам таҳдид солмоқда. Шунинг учун биз Украина билан биргамиз», — деди у. Ўша куннинг ўзида Германия ҳукумати Украинага 66 та миналарга чидамли зирҳли техника, 50 мингга яқин артиллерия снаряди ва ҳаво ҳужумидан мудофаа тизими IRIS-T учун ўқ-дорилар етказилганини маълум қилди.

Бундан олдин Германия ташқи ишлар вазири Анналена Бербок Берлин 2029 йилгача Киевга 11 миллиард евродан ортиқ ҳарбий ёрдам ажратишини маълум қилганди, бу маблағнинг 3 миллиард евроси айнан жорий йилга тўғри келади. 2025 йил охиригача Украина IRIS-T ҳаво ҳужумидан мудофаа тизимидан тўрттасини ва унга 300 дона ракетани, шунингдек, Patriot учун 30 та ракета, 15 та Leopard 1 танкини, 25 та Marder жанговар машинасини ҳамда 100 минг дона артиллерия ўқ-дориларини олади.