Ҳусийчилар ракетаси Тел-Авивдаги аэропорт яқинида қулади

Ямандаги ҳусийчилар Исроилга қарата учирган баллистик ракета Тел-Авивдаги Бен-Гурион аэропорти яқинида портлади.

Интернетда эълон қилинган кадрларда ҳайдовчилар йўлда машиналарни тўхтатиб, яширинишга уринаётганини кўриш мумкин. Ижтимоий тармоқларда йўловчилар терминалидан олинган тасвирларда тутун устуни кўтарилгани акс этган.

Кўринишидан, ракета аэропорт атрофидаги панжара яқинига тушган.

Исроил оммавий ахборот воситалари хабар беришича, портлаш оқибатида тўрт киши яраланган, яна икки киши бомбапанагоҳга кетаётганда жароҳатланган.

Бен-Гурион аэропортида парвозлар бир муддат тўхтатилди.

Зарба оқибатида аэропортнинг учинчи терминалига олиб борувчи йўл шикастланган.

Исроил телевидениесида портлаш оқибатида ҳосил бўлган чуқурлик атрофида мамлакат полиция марказий округи бошлиғи Яир Хецрони қутқарув хизматлари ва аэропорт ходимлари билан бирга тургани акс этган кадрларни намойиш этди.

«Шундоққина орқамда воқеа жойи кўриниб турибди – диаметри бир неча ўн метр ва чуқурлиги бир неча ўн метр бўлган воронка, – деди у. – Шуни айтиш керакки, аҳоли кўрсатмаларга қулоқ тутди ва шунинг учун бугун бизда стресс ҳолатларини ҳисобга олмаганда, ушбу ҳодиса натижасида жабрланганлар йўқ. Шуни таъкидлашим керакки, вазият барқарорлаштирилган, полиция Аэропортлар бошқармаси билан биргаликда барча кириш йўлларини ёпмоқда ва жиддий зарар йўқ».

Шунга қарамай, Германиянинг Lufthansa ва Испаниянинг Air Europa авиакомпаниялари якшанба куни Тел-Авивга парвозларни тўхтатди.

Ҳаво ҳужумидан мудофаа тизими ракетани нега ўтказиб юборган?

Исроил ҳарбийлари ҳодиса тафсилотлари текширилаётгани ва нима учун ҳаво ҳужумидан мудофаа тизимлари ракетани тутиб ололмаганига аниқлик киритаётганини маълум қилган.

Ҳусийчилар вакили Яҳё Сари ўз телемурожаатида Исроил аэропорти «энди авиаташувлар учун хавфсиз эмаслиги»ни айтди.

Мудофаа вазири Исраэл Кац эса шундай деди: «Ким бизга зарар етказса, бунга жавобан етти карра кучлироқ зарба қабул қилиб олади».

Эрон кўмагида ҳаракат қилаётган ҳусийчилар мунтазам равишда «Бен-Гурион» аэропортини ўққа тутишга уриниб келмоқда.

Гуруҳ Ғазодаги Ҳамас билан бирдамлик белгиси сифатида Исроилга ракета ҳужумлари уюштирмоқда, аммо камдан кам ҳолатларда Исроил ҳаво мудофаасини ёриб ўтишга муваффақ бўлинмоқда.

Исроил охирги марта ҳусийчиларга қарши ҳарбий ҳаракатларни уч ой олдин амалга оширган эди. Ўшандан бери Қўшма Штатлар ва унинг халқаро коалиция бўйича ҳамкорлари Исроилга жавоб ҳаракатларидан тийилишни таклиф қилиб, ҳусийчиларга зарбалар бериб келмоқда.

Исроилнинг якшанба куни ҳусийчилар томонидан ўққа тутилиши сўнгги икки кун ичида бешинчиси бўлди.

АҚШ Ямандаги ҳусийчиларга қарши операцияларни, асосан, ҳаводан зарбалар билан давом эттирмоқда. Охирги марта бундай зарбалар якшанба куни эрта тонгда берилди – араб нашрлари иттифоқ авиациясининг 10 та ҳужуми ҳақида хабар берган.

АҚШнинг ҳусийчиларга қарши кампанияси

АҚШ қуролли гуруҳнинг Қизил денгиздаги кемаларга ҳужумига жавобан Яман ҳусийчиларига қарши кампания бошлаган.

Ҳусийчилар 2023 йил ноябр ойида Исроилнинг Ғазодаги операцияси бошланганидан кейин Қизил денгиз ва Адан кўрфазидаги савдо кемаларини ўққа тутишга киришганди.

Гуруҳ баёнотларида бу ҳаракатлар Исроил ва Ҳамас ўртасидаги урушда фаластинликларни қўллаб-қувватлашга қаратилгани ва фақат Исроил, АҚШ ёки Буюк Британия билан боғлиқ кемалар нишонга олингани таъкидланади.

Шу билан бирга, ушбу мамлакатларга ҳеч қандай алоқаси бўлмаган кемалар бир неча бор ўққа тутилган.

Ҳусийчилар бир неча бор Исроилни ракеталар билан ўққа тутган, лекин бирор марта жиддий муваффақиятга эришилмаган.

Март ойида Трамп ҳусийчилар назоратидаги ҳудудларга кенг кўламли зарбалар беришни буюрди ва улар «бутунлай йўқ қилиниши» билан таҳдид қилди.

Апрел ойида ҳусийчилар ҳукумати АҚШнинг Ямандаги Қизил денгиз соҳилидаги «Рас-Иса» нефт терминалига берган авиазарбалари оқибатида камида 74 киши ҳалок бўлгани, яна 171 киши яраланганини маълум қилганди.

Ғарб коалицияси кампанияси Ямандаги фуқаролар уруши фонида ўтказилмоқда, уруш 10 йил олдин, ҳусийчилар мамлакат шимоли-ғарбий қисмини назорат остига олганида янги босқичга кўтарилган эди.

Ҳарбий ҳаракатлар оқибатида 150 мингдан ортиқ киши ҳалок бўлган, гуманитар фалокат юзага келган: 4,8 миллион аҳоли ўз уйларини тарк этишга мажбур бўлган, 19,5 миллион киши – аҳолининг ярми – у ёки бу ёрдамга муҳтож бўлиб қолмоқда.