Уиткофф: Ҳамас Исроил билан сулҳ бўйича келишувни рад этди

Ҳамас ташкилоти АҚШ таклиф қилган сулҳ битимини рад этди. Бу ҳақда 26 май, душанба куни АҚШ президенти Доналд Трампнинг махсус вакили Стив Уиткофф AFP'га маълум қилди. Аввалроқ Ҳамас жангчилари Исроил билан келишувга эришишга тайёр экани ҳақида хабарлар тарқалган эди.

Фаластин томонидан музокаралар доираларидаги манбаларга таяниб AFP'нинг аниқлик киритишича, Уиткофф таклиф қилган келишув жангчилар томонидан яна ўн нафар гаровга олинган исроилликни озод қилиш, 70 кунлик ўт очишни тўхтатиш ва Исроил қўшинларини Ғазо секторидан қисман олиб чиқиб кетишни назарда тутган. Биринчи беш тирик гаровга олинган шахс сулҳнинг биринчи ҳафтасида, яна беш нафари эса жанговар ҳаракатлардаги 70 кунлик танаффус охирида озод этилиши керак эди.

Айни пайтда Исроил бош вазири Бинямин Нетаняҳу Telegramʼда видео жойлаштирди ва унда у Ҳамас гаровга олинганлар ҳақида «бугун бўлмаса, эртага» баёнот беришга умид қилаётганини билдирди. Шу билан бирга, у Исроил ҳукумати барча гаровга олинганларни – «ҳам тирикларни, ҳам ўликлар»ни ватанига қайтаришга қатъий қарор қилганини таъкидлади. "Агар бугун уддалай олмасак, эртага, эртага бўлмаса, индинга", – деб ваъда берди у.