Ортиқча ундирилган солиқни қайтаришнинг кечиктирилган ҳар бир куни учун пеня тўланади

Солиқ тўловчилар томонидан ортиқча тўланган ёки ундан ортиқча ундирилган солиқ суммасини тўловчининг қарзи бўлмаган ҳолларда солиқ тўловчига қайтарилади ёки келгуси тўловлар учун ҳисобга олинади. 

Бу тартиб Сенатнинг 25-ялпи мажлисида маъқулланган “Ўзбекистон Республикасининг Сoлиқ кодексига ўзгартириш ва қўшимчалар киритиш тўғрисида”ги Қонунда белгиланган.

Янги тартибга кўра, солиқ тўловчига ортиқча тўловни қайтариб бериш муддатидан ўтган ҳар бир кун учун солиқ хизмати органлари томонидан пеня тўланади.

“Солиқ органлари томонидан солиқ тўловчиларни 42та мезон асосида 3 сегментга − “виждонли”, “шубҳали” ва “мунтазам ҳуқуқбузарлар”га ажратиш белгиланмоқда. Мана шу таснифдан келиб чиққан ҳолда солиқ тўловчилар устидан назорат ва текширув амалга оширилади. 

Шунингдек, Солиқ кодексининг янги таҳриридаги ўзгартиришларга асосан солиқ қарзини дебитор қарздорлик ҳисобидан ундириш тартибидан воз кечилади”, − дея сенатор Мухамет Жумагелдиевнинг сўзларини келтирмоқда Kun.uz мухбири.

Маълум қилинишича, солиқ тўловчиларга қулайликлар яратиш мақсадида солиқларни тўлаш муддатларини ўзгартириш, солиқ тўлашни кечиктириш ёки бўлиб-бўлиб тўлаш ваколатлари халқ депутатлари маҳаллий кенгашларга берилади.