O‘zbekiston elchisi Andorra knyazi-hamraisiga ishonch yorliqlarini topshirdi

O‘zbekistonning Andorraga yangi tayinlangan elchisi (qarorgohi Madrid shahrida joylashgan) Farrux Tursunov Andorra knyazi-hamraisi, Urxelsk yepiskopi Joan Enrik Vives-i-Sisilga ishonch yorliqlarini topshirdi.

Qayd etilishicha, tantanali marosimdan so‘ng bo‘lib o‘tgan suhbat chog‘ida Urxelsk yepiskopi elchini samimiy qutlab, O‘zbekistonda kechayotgan o‘zgarishlar jarayonlarini katta qiziqish bilan kuzatib borishini ta’kidlagan.

Andorra hamraisi O‘zbekiston millatlararo va konfessiyalararo totuvlikning muvaffaqiyatli namunalarini ko‘rsatayotgani, 130 dan ortiq millat va elatlar, shuningdek, 2000 dan ortiq diniy tashkilotlar tinch va o‘zaro hurmat muhitida istiqomat qilayotganini e’tirof etgan.

Uchrashuvda Andorra kichik bo‘lishiga qaramay, O‘zbekiston bilan munosabatlarni rivojlantirishga katta ahamiyat berayotgani, uni muhim va hurmatli hamkor sifatida qabul qilishi alohida qayd etilgan. O‘zbekistonning sayyohlik salohiyati, xususan Samarqand shahrining buyuk tarixi va madaniy merosiga e’tibor qaratilgan.

Bundan tashqari, Andorra hamraisi O‘zbekistonga tashrif buyurish istagini bildirgan va andorralik yoshlarning boy tarix va madaniyatga ega mamlakatlarga qiziqishi ortib borayotgani, O‘zbekiston esa bunday yo‘nalishlar orasida alohida o‘rin tutayotganini ta’kidlagan.

Farrux Tursunov O‘zbekistonning Ispaniyadagi favqulodda va muxtor elchisi sifatida 2023 yil 7 dekabr kuni Madrid shahriga tashrif buyurgan edi. Diplomat 2024 yilning aprel oyida O‘zbekiston elchisi sifatida Ispaniya qiroli Filipp VI ga ishonch yorliqlarini topshirgan.

Shuningdek, Farrux Tursunov mamlakatimizning BMT Turizm tashkilotidagi (avvalgi Butunjahon turizm tashkiloti) doimiy vakili hisoblanadi. Bundan tashqari, elchi Farrux Tursunov shu yil mart oyida Andorra hamraisi, Fransiya prezidenti Emmanuel Makronga ishonch yorliqlarini topshirgan edi.