Ekologik nosoz avtomobillar haydovchilariga chora ko‘riladi

10 apreldan Qoraqalpog‘iston Respublikasi, viloyatlar markazlari va Toshkent shahrida navbatdagi «Toza havo» ekologik oyligi boshlandi. Bu haqda Ekologiya vazirligi xabar berdi.

Tadbir Ekologiya, atrof-muhitni muhofaza qilish va iqlim o‘zgarishi vazirligi hamda Ichki ishlar vazirligi bilan hamkorlikda o‘tkaziladi va 10 maygacha davom etadi.

Tadbir «Ekologik nazorat to‘g‘risida»gi qonunlar ijrosini ta’minlash, foydalanishda bo‘lgan avtotransport vositalarining ekologik holatini nazorat qilish maqsadida ikki bosqichda bo‘lib o‘tadi. Birinchi bosqich 10 apreldan 10 maygacha, ikkinchi bosqich esa 10 avgustdan 10 sentabrgacha tashkil etiladi (Toshkent shahrida 10 sentabrdan 10 oktyabrgacha).

«Toza havo» oyligi davomida muntazam YPX maskanlarida, majburiy texnik ko‘rikdan o‘tkazishda hamda ko‘chalarda harakatlanayotgan avtotransport vositalari tekshiriladi.

Ta’kidlanishicha, ekologik nosoz deb topilgan avtotransport vositalari haydovchilariga nisbatan Ma’muriy javobgarlik to‘g‘risidagi kodeksning 87- va 125-moddalariga ko‘ra chora ko‘riladi. Shuningdek, «Atmosfera havosini muhofaza qilish to‘g‘risida»gi qonunning 13-moddasiga asosan, avtotransport vositalaridan nosozligi bartaraf etilgunga qadar foydalanish taqiqlanadi.