Germaniyada mamlakat fuqaroligini uch yil ichida olish imkoniyati bekor qilinadi

XDI/XSI konservativ bloki va Germaniya Sotsial-demokratlar partiyasi koalitsiya muzokaralarida Germaniya fuqaroligini uch yil ichida olish imkoniyatini bekor qilishga kelishib oldi, deb xabar beradi Die Zeit nashri.

Shu bilan birga, koalitsiya Germaniya pasportini besh yil ichida olish imkoniyatini saqlab qolishga qaror qildi.

Deutsche Welle’ning yozishicha, koalitsiya migratsiya qonunchiligini kuchaytirishi mumkin. Xususan, noqonuniy migrantlarni mamlakatdan faol chiqarib yuborish, kuchaytirilgan chegara nazoratini saqlash va Germaniyadan boshpana olishga da’vogarlik qilishiga ruxsat berilmaydigan davlatlar ro‘yxatini kengaytirish taklif qilinmoqda.

Germaniya parlamenti 2024 yil yanvarda nemis fuqaroligi to‘g‘risidagi qonunga o‘zgartirish kiritishni ma’qullagan edi — bu uni olish jarayonini soddalashtirishga xizmat qiladi. Mamlakat hududida sakkiz yil o‘rniga besh yil yashash orqali fuqarolikni olish imkoniyati paydo bo‘ldi. Bundan tashqari, alohida holatlarda Germaniya pasporti mamlakatda uch yil yashaganlarga ham beriladi. Gap «alohida integratsiya muvaffaqiyatlari» — til bilish bo‘yicha C1 daraja va jamoatchilik orasida faol bo‘lish haqida ketmoqda, masalan, turli birlashma hamda assotsiatsiyalarda ishtirok etish. Germaniya pasportiga da’vogarlar, shuningdek, o‘zi va oila a’zolarini mustaqil moliyaviy tomondan ta’minlay olishi kerak.

Fuqarolik to‘g‘risidagi qonunga kiritilgan o‘zgartirishlar 2024 yil 1 iyundan beri amalda.

9 aprel kuni XDI/XSI konservativ bloki va Sotsial-demokratlar partiyasi hukmron koalitsiyani shakllantirishga kelishib olgani ma’lum qilindi. XDI/XSI fevral oyida bundestagda muddatidan oldin o‘tkazilgan saylovlarda birinchi o‘rinni egallagan edi. Ikkinchi o‘rin «Germaniya uchun muqobil» o‘ta o‘ng partiyasiga nasib etgan, Sotsial-demokratlar partiyasi esa u uchinchi bo‘lgandi.