O‘zbekiston elchisi UNIDO huzurida akkreditatsiyadan o‘tdi

O‘zbekistonning BMT Sanoatni rivojlantirish tashkiloti (UNIDO)dagi doimiy vakili Baxtiyor Ibragimov tashkilot bosh direktori Gerd Myuller bilan uchrashuv o‘tkazdi va unga o‘zining ishonch yorlig‘ini topshirdi.

«Dunyo» xabariga ko‘ra, suhbat chog‘ida UNIDO tomoniga mamlakatda amalga oshirilayotgan islohotlar, «O‘zbekiston – 2030» strategiyasining mazmun-mohiyati to‘g‘risida batafsil ma’lumotlar berildi. Tomonlar sanoatni rivojlantirish bo‘yicha respublikada amalga oshirilayotgan loyihalar xususida fikr almashdi.

Hozirgi kunda UNIDO O‘zbekistonda tekstil sanoatini modernizatsiya qilish, eko-sanoat parklarini rivojlantirish, energetika sohasida iqlim o‘zgarishi ta’sirini va suv tanqisligini kamaytirish hamda Orol dengizi hududlarini tiklash va muhofaza qilish uchun geografik axborot tizimlarini qo‘llash kabi loyihalarini amalga oshirmoqda.

«Yashil» energetika, ekologiya, agrobiznes va tog‘-kon sanoati sohalarida loyihalarni ishlab chiqish o‘zaro hamkorlikning istiqbolli yo‘nalishlari sifatida ko‘rilmoqda.

Muloqot natijasida tomonlar o‘zaro manfaatga asoslangan hamkorlikni yangi bosqichga olib chiqishga kelishib oldi.

2023 yil 21 noyabr kuni O‘zbekistonning yangi elchisi Baxtiyor Ibragimov Avstriya prezidenti Aleksandr Van der Bellenga ishonch yorliqlarini topshirgan edi.