Сурия банкнотларини Россияда босиб чиқаришни тўхтатмоқчи

Сурия фунтлари 2012 йилдан буён Россия Федерациясининг «Гознак»ида чоп этилмоқда. Сурия ҳукумати БАА ёки Германия компаниялари билан янги шартнома имзолаш, шунингдек, банкнотларни улардан Башар Асад портретини олиб ташлаган ҳолда қайта лойиҳалаштириш ниятида.

Фото: Juma Mohammad/IMAGESLIVE via ZUMA Wire/picture alliance

Суриянинг янги ҳукумати Россияда мамлакат миллий валютасини босиб чиқаришни тўхтатмоқчи, ўрнига Бирлашган Араб Амирликлари (БАА) ёки Германия компаниялари билан ҳамкорликни йўлга қўймоқчи, деб хабар берди Reuters агентлиги 16 май, жума куни манбаларга таяниб. Сурия ҳукумати 2000 фунтлик купюралардан ўтган йилнинг декабрь ойида ҳокимиятдан ағдарилган диктатор Башар Асад портретини олиб ташлаб, банкнотлар дизайнини ҳам ўзгартиришни режалаштирмоқда.

Bundesdruckerei давлат федерал босмахонаси ва Giesecke+Devrient хусусий компанияси Германияда Сурия валютасини босиб чиқаришга аллақачон қизиқиш билдирган. Reuters агентлиги маълум қилишича, БААда жойлашган Oumolat билан ҳам музокаралар олиб борилмоқда. Марказий банк раҳбари ва Сурия молия вазири май ойи бошида Бирлашган Араб Амирликларига ташриф буюрди.

Россиянинг «Гознак»и Сурия банкнотларини 2012 йилда босиб чиқаришни бошлаган. Илгари Сурия фунтларини босиб чиқариш Австрия Марказий банкининг OeBS бўлими томонидан амалга оширилган. Шартнома Европа Иттифоқининг Суриядаги фуқаролар уруши ортидан киритган санкциялари туфайли бекор қилинган.

Февраль ойида Сурия Марказий банки Дамашқ аэропортига Россиядан бортида Сурия фунти бўлган юк самолёти келгани ҳақида хабар берган эди. Ўшанда Reuters манбасининг айтишича, гап Башар Асад даврида Гознак томонидан чоп этилган «юзлаб миллиардлар» ҳақида кетмоқда. Унинг режими ағдарилгунга қадар улар Сурияга етиб боришга улгурмаган.

#Сурия #Россия