АҚШда Metallica концерти кучсиз зилзилага сабаб бўлди

Metallica рок гуруҳи Блэксбург шаҳрида жойлашган Виргиния технология университетининг «Лейн» стадионида концерт берди. Штат сейсмологик обсерваторияси (VTSO) маълумотларига кўра, концерт вақтида ҳудудда кичик зилзила кузатилган.

Қайд этилишича, кучсиз зилзила маҳаллий футбол ишқибозлари учун анъанавий мадҳияга айланган Enter Sandman композицияси ижро этилган вақтга тўғри келган. Бу вақт стадионга тўпланган қарийб 60 минг киши синхрон тарзда сакрашни бошлаган.

«Лейн»дан бир километр узоқликка ўрнатилган сейсмограф тупроқнинг кучсиз ҳаракатини қайд этган. VTSO директори Мартин Чапманинг сўзларига кўра, зилзила кучли Рихтер шкаласи бўйича 1 баллдан кучсизроқ бўлган ва концерт ўтказилган ҳудуддан ташқарида кузатилмаган.

Эслатиб ўтамиз, 2024 йил июн ойида америкалик қўшиқчи Тейлор Свифтнинг Шотландия пойтахтидаги концерти давомида ҳам сейсмик фаоллик қайд этилганди. Мутахассисларнинг маълумотларига кўра, ер юзасидаги тебранишлар 7-9 июн кунлари кузатилган ва шоу ўтказилган жойдан 6 километр узоқликкача ёйилган.