Тошкент халқаро аэропортида 3 нафар қизни фоҳишалик учун Таиландга юборишга уринган аёл ушланди

Аёлнинг Таиланддаги таниши қизларни кутиб олиб, уларни иш билан таъминлаши керак бўлган. Ҳолат юзасидан жиноят иши қўзғатилиб, гумонланувчи қамоққа олинган.

Фото: Видеодан кадр

Тошкентда қизларни фоҳишалик учун Таиландга жўнатиб, ўша ердаги таниши орқали пулламоқчи бўлган аёл далилий ашёлар билан қўлга олинди. Бу ҳақда Самарқанд вилояти ИИБ матбуот хизмати хабар берди.

Қайд этилишича, Тошкент шаҳрида яшовчи аёл жиноий гуруҳ тузиб, моддий жиҳатдан қийналган қизларни фоҳишалик ва қўшмачилик қилиш учун Таиландга жўнатишни режа қилган.

ИИВ Тезкор-қидирув департаменти Жиноят-қидирув хизмати, Самарқанд вилояти ИИБ ҳамда ДХХ ходимлари ҳамкорлигида 21 июн куни Тошкент халқаро аэропортида тезкор тадбир ўтказилган. Тадбир давомида 31, 23 ва 18 ёшли уч нафар қизни Таиландга юборишга уринган вақтида 53 ёшли аёл қўлга олинган.

Аниқланишича, аёлнинг Таиланддаги эркак таниши қизларни кутиб олиб, иш билан таъминлаши эвазига 5 минг доллар юбориши керак бўлган. Қизлар эса уч ой давомида фоҳишалик қилиб, пул ишлаб бериши режалаштирилган.

Ҳолат юзасидан Жиноят кодексининг 135-моддаси (одам савдоси) билан жиноят иши қўзғатилиб, гумонланувчи процессуал тартибда қамоққа олинган.

#Таиланд #фоҳишалик