ЕИ Украина қуроллари учун Россия даромадларидан 1 млрд евро ажратади

Европа Иттифоқи Украина мудофаа корхоналарида ишлаб чиқаришни қўллаб-қувватлаш учун Россиянинг музлатилган активларидан тушган маблағдан 1 миллиард евро ажратди. «Украина ўзини яхшироқ ҳимоя қилиши учун (Россияга қарши мудофаа урушида) Украина мудофаа саноати учун ҳозиргина бир миллиард евро ажратдик», деди Европа Иттифоқининг ташқи ишлар ва хавфсизлик сиёсати бўйича олий вакили Кая Каллас 9 май, жума куни Лвивда бўлиб ўтган ЕИ ташқи ишлар вазирларининг йиғилишида. Ушбу маблағлар «келгуси ойларда қўшимча ҳарбий ёрдам беради, бу жуда муҳим», деди Каллас.

Йиғилишда иштирок этган Франция ташқи ишлар вазири Жан-Ноэл Барронинг таъкидлашича, унинг мамлакати, ўз навбатида, музлатилган Россия активларидан тушган маблағни Францияда ишлаб чиқарилган ва «Россия ҳужумларини қайтариш учун» Украинага етказилган 60 га яқин Caesar гаубицаларини таъмирлашни молиялаштириш учун ишлатади. «Биз тинчликни хоҳлаймиз ва бугунги кунда тинчлик йўлида фақат Москва тўсиқ бўлиб турибди», — дея қўшимча қилди Барро.

«Украина қуроллари учун Россия пули. Бугун ЕИ Украинани ҳарбий қўллаб-қувватлаш учун деярли 1,9 миллиард евро ажратиш ниятини расман эълон қилди. Бу тарихий қарор, чунки Украина учун қурол музлатилган Россия активларидан Европа Тинчлик жамғармаси орқали олинган даромадлар ҳисобига сотиб олинади», деб ёзди Украина бош вазири Денис Шмихал Лвивда ўтказилган учрашув якунлари бўйича Telegram каналида.