Тошкентда “закладка” билан шуғулланган талаба 12 йилга қамалди

Тошкент шаҳридаги олийгоҳлардан бирининг 1-босқич талабаси узоқ муддатга озодликдан маҳрум қилинди. Kun.uz суд ҳукми билан танишди.

Суд ҳужжатида келтирилишича, 2006 йилда Сурхондарё вилоятининг Денов туманида туғилган И.А. пойтахтдаги олийгоҳлардан бирида таҳсил олган. И.А. 2024 йил 26 октябр куни соат 23:30 да Чилонзор туманидаги 195-умумтаълим мактаби олдидан ўтиб кетаётганида шубҳа уйғотгани сабабли ИИО ФМБ ППХ ходимлари томонидан тўхтатилган.

Талабанинг қўлидаги сумка текшириб кўрилганида мижозлар учун хуфиёна жойга яшириш мақсадида олиб юрилган 16 дона ўрамдаги гиёҳванд модда борлиги аниқланган. И.А.нинг ёнидан 12,71 грамм оғирликдаги гиёҳванд модда ашёвий далил тариқасида олинган. Шунингдек, И.А.нинг кўрсатувига биноан 9 та манзилдан у яшириб кетган “закладка”лар топилган.

Бундан ташқари, талаба йигит 2024 йил 6 октябр куни Telegram орқали Сурияда фаолият олиб бораётган террорчилик ташкилоти аъзоси билан мулоқот олиб боргани ҳам аниқланган. У мулоқотда мазкур террорчилик ташкилоти таркибига бориб қўшилиш борасида сўзлашган.

И.А. судда айбига қисман иқрорлик билдирган.

“2024 йил 26 октябр куни иш топиш мақсадида уяли телефоним орқали интернетга кириб, Instagram’даги эълонни кўриб қолдим. Ушбу эълонни жойлаштирган шахс билан алоқага чиқдим. У менга етказиб бериш хизматида иш борлигини, манзилдан нарсани олиб, бошқа манзилга етказиб бериш лозимлигини, иш ҳақи шу куннинг ўзида тўланишини билдирди.

Ушбу шартларга рози бўлганимдан сўнг мендан паспортимни ушлаган ҳолда суратга тушириб юборишни талаб қилишди. Талабни бажаргач, менга геолокация ташлаб беришди. Геолокация бўйича Қибрай туманидан полиэтилен пакетни олдим. Иш берувчи бу гиёҳвандлик воситаси эканини, уни 25 та жойга жойлаштириб, геолокацияни ташлагач 100 доллар тўлаб беришини маълум қилди.

Шундан сўнг гиёҳванд моддасини Чилонзор тумани ҳудудига жойлаштира бошладим”, деган йигит суддаги кўрсатмасида.

Талаба ҳақиқатан ҳам Суриядаги террорчилик ташкилоти аъзоси билан гаплашганини, аммо бу ишни қизиқиш туфайли қилганини, террорчилик ҳаракатига қўшилишни истамаганини маълум қилган. У қилмишидан пушаймонлигини айтиб, суддан енгиллик сўраган.

ЖИБ Чилонзор туман судининг 2025 йил 1 майдаги ҳукми билан И.А. Жиноят кодексининг 244-2-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) 1-қисми ва 25,273-моддаси 5-қисмида (гиёвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотишга қасд қилиш) назарда тутилган жиноятларни содир этганликда айбли деб топилган. Унга 12 йил муддатга озодликдан маҳрум қилиш жазоси тайинланган.