Сирдарёда бир неча ўғрилик содир этган жиноий гуруҳ қўлга олинди

Сирдарё вилояти, Оқолтин туманида бир неча бор ўғрилик жиноятини содир этган жиноий гуруҳ қўлга олинди. Бу ҳақда Сирдарё вилояти ИИБ хабар берди.

Қайд қилинишича, Сирдарё туманида яшовчи фуқаро таниши билан тил бириктириб, 27 февраль куни Оқолтин туманида жойлашган компьютер қисмлари савдоси билан шуғулланувчи дўконга яширинча кириб, 51 млн 160 минг сўмлик товарларни ўғирлаб кетган. Сўнгра ушбу буюмларни арзон нарх эвазига сотиб юборган.

Шунингдек, улар 13 март куни Оқолтин туманидаги бошқа компьютер қисмлари дўконига яширинча кириб, 43 млн 90 минг сўмлик товарларни ўғирлаб, ўз танишларига сотиб юборган.

Терговга қадар текширув ҳаракатлари жараёнида мазкур жиноятни содир этган шахслар қўлга олинган. Ҳозир терговга қадар текширув давом этмоқда.