Қозоғистон Ўзбекистондан суғориш учун 12,6 миллиард куб метр сув олди

2024 йил октябрь ойидан буён Ўзбекистон Қозоғистонга 12,6 миллиард куб метр сув жўнатган. Бу Қозоғистоннинг жанубий вилоятлари деҳқонларига далаларни суғориш учун керак бўлади.

Октябрдан апрелгача Ўзбекистон Қозоғистонга аввал режалаштирилганидан 1,7 миллиард куб метр кўпроқ сув жўнатган. Бу ҳақда Қозоғистон Республикаси сув хўжалиги вазири Нуржан Нуржигитов Самарқандда бўлиб ўтган форумда маълум қилди.

«Ушбу сув Қозоғистоннинг жанубий вилоятлари фермерларини суғориш даврида таъминлаш учун ишлатилади. Трансчегаравий сувларни тақсимлаш ва бошқариш бутун Марказий Осиё бўйлаб сув хавфсизлигини таъминлашда муҳим аҳамиятга эга», деб таъкидлади расмий.

У мамлакатларни сув танқислигининг олдини олиш учун ҳамкорлик қилишга чақирди. Аввалроқ Қозоғистон ва Ўзбекистон 2024 йил октябридан 2025 йил октябригача Қозоғистонга 16 миллиард куб метрдан ортиқ сув жўнатиш бўйича келишиб олган эди.

«Шимолий Орол денгизига қарийб 1,8 миллиард куб метр сув қуйилган. Бу аввал прогноз қилинганидан 120 миллион куб метрга кўпдир. Қозоғистонга 490 миллион куб метр сув Дўстлик давлатлараро канали орқали етиб келди», деб хабар берди Сув хўжалиги вазирлиги.

Қозоғистоннинг жанубий вилоятлари деярли бутунлай Қирғизистон ва Ўзбекистондан етказиладиган сувга боғлиқ. Сувнинг 60 фоизи ҳар доим қишлоқ хўжалигига сарфланади.