Миллиардер Уоррен Баффетт Berkshire Hathaway бош директорлигидан кетади

Америкалик миллиардер Уоррен Баффетт Berkshire Hathaway компанияси бош директорлиги лавозимидан кетади. Бу ҳақда у акциядорларнинг йиллик йиғилишида маълум қилди.

94 ёшли Баффетт компаниянинг янги бош директори лавозимига ўз ўринбосари Грег Абелни тайинлашни тавсия қилди.

Баффетт Berkshire Hathaway’дан бутунлай кетиш ва унинг акцияларини сотишни режалаштирмаётганини маълум қилди.

Уоррен Баффетт — дунёнинг энг бадавлат инсонларидан бири бўлиб, Forbesʼнинг охирги йиллик рейтингида унинг бойлиги 159 миллиард долларга баҳоланган. У ўзининг деярли барча капиталини муваффақиятли инвестициялар ортидан тўплаган.

Баффетт Berkshire Hathaway’ни 1965 йилда сотиб олган — ўшанда у инвестор туғилган Небраска штатидаги кичик текстик корхонаси эди. Баффетт унинг асосида инвестициялар ва суғурта бизнеси билан шуғулланувчи улкан конгломерат қурди. Ҳозирда Berkshire Hathaway’нинг қиймати триллион доллардан ошади.