Шолц ва Макрон Украинага кейинги ҳарбий ёрдамни ваъда қилмоқда

Германия канцлери Олаф Шолц ва Франция президенти Эммануэл Макрон уч йилдан ортиқ вақтдан бери Россия агрессиясидан ўзини ҳимоя қилиб келаётган Украинага келгусида ҳарбий ёрдам беришга ваъда берди. «Украина бизга таяниши мумкин, Украина Европага таяниши мумкин, деган фикрда иккаламиз ҳам бирдекмиз», — деди Шолц 18 март, сешанба куни Берлинда Макрон билан музокарадан сўнг.

«Трамп-Путин келишуви биринчи қадам, аммо тўлиқ сулҳ зарур»

Германия канцлери АҚШ ва Россия президентлари Доналд Трамп ва Владимир Путин ўртасидаги телефон суҳбати натижаларига изоҳ берди, унинг давомида Путин Украинада ўт очишни тўлиқ тўхтатишдан бош тортди. Шолц бу музокаралар охирида эълон қилинган энергия инфратузилмасига ҳужумларни тўхтатиш «муҳим биринчи қадам» бўлиши мумкинлигини айтди, аммо мақсад «тўлиқ ўт очишни тўхтатиш» бўлиши керак. Макрон, шунингдек, назорат қилиниши мумкин бўлган оташкесим зарурлигини таъкидлади. Бундан ташқари, Украина ва Киевнинг тинчлик музокараларида иштирок этиши учун хавфсизлик кафолатлари зарур, дея қўшимча қилди у. Олаф Шолц унинг нуқтайи назарини қўллаб-қувватлаб, «Украина ортидан» ҳеч қандай қарор қабул қилмасликка чақирди.

Эммануэл Макрон Олаф Шолцни консерваторлар ва социал-демократларнинг бўлажак ҳукумат коалицияси томонидан режалаштирилган кўп миллиард евролик мудофаа ва инфратузилма пакети бўйича Бундестагдаги «тарихий» овоз бериш билан табриклади. Бу Германия ва Европа учун «яхши янгилик», дея қўшимча қилди у.

ST: Украинага 10 000 дан ортиқ тинчликпарварлар бориши мумкин

Буюк Британия бош вазири Кир Стармер бир кун аввал бўлиб ўтган ЕИ етакчилари ва НАТО вакилларининг онлайн конференциясида Украина учун 10 мингдан ортиқ кишилик Ғарб тинчликпарвар кучларини яратиш режаларини айтиб ўтди, деб хабар берди Британиянинг The Sunday Times (ST) газетаси 16 март куни йиғилишда иштирок этган манбаларга таяниб.

«Ҳукуматдаги юқори мартабали манбалар бош вазир қуруқликдаги қўшинларни тақдим этишни таклиф қилган учта давлатдан кўра «сезиларли кўпроқ» давлатларнинг қўллаб-қувватлашини таъминлаганини айтди, аммо бу кучларнинг асосий қисми Буюк Британия ва Франциядан келиши мумкин», деб ёзади газета ва Россия ҳарбий ҳужумидан тўрт йилдан бери ҳимояланаётган давлат саъй-ҳаракатларига «муҳим кучлар» ва «катта давлатларнинг» жалб қилинганини қўшимча қилди. Кўпроқ давлатлар «бошқа йўллар билан ўз ҳиссаларини қўшадилар», деб ёзади The Sunday Times  Британия ҳукуматининг юқори мартабали амалдоридан иқтибос келтирган ҳолда.

Жами 35 га яқин давлат миссияга қурол етказиб бериш ҳамда логистика ва разведка ёрдамини кўрсатишга келишиб олди, деб ёзади газета. Йиғилиш иштирокчиларининг фикрича, бу «Россия ва Украина ўртасида ўт очиш тўхтатилган тақдирда» Кремлни янги босқинни бошлашдан қайтариши мумкин. Стармернинг ўзи кўп миллатли тинчликпарвар кучларни яратиш режалари «оператив босқич»га ўтаётганини айтди.