Ню-Йоркдаги ўрмон ёнғинлари нима сабабдан келиб чиққани маълум бўлди

Ню-Йоркда юз берган ўрмон ёнғинлари маҳаллий аҳолининг эҳтиётсизлиги оқибатида юзага келган. Бу ҳақда штат расмийларига таяниб, AOL нашри хабар берди.

Саффолк округи полиция комиссарининг айтишича, амалдаги «ишчи версия»га кўра, ёнғин Мэнорвилл қишлоғида яшовчи фуқаролардан бири олов ёқиш учун картондан фойдалангани оқибатида келиб чиққан.

Детективлар шанба куни бошланган кучли шамол чўғни тезда тарқатиб, Лонг-Айленд шарқида тўртта ўрмон ёнғинини юзага келтирган деб ҳисобламоқда. Ёнғин оқибатида 600 акр ер (240 гектар) кулга айланган. 9 март кунига келиб Пайн-Барренсдаги энг катта ёнғин ўчоғи ўчирилган, қолган ҳудудлардан ёнғин назоратга олинган.

Маълумотларга кўра, алангага қарши кураш давомида икки нафар ўт ўчирувчи жароҳат олган, жумладан, улардан бирининг юзи куйган. Шунингдек, иккита тижорий бинога шикаст етган, бироқ бирорта турар-жой биноси зарар кўрмаган.

Эслатиб ўтамиз, январ бошларида Лос-Анжелес округида ёнғинлар бошланган эди. Ушбу ёнғинлар оқибатида камида 28 киши ҳалок бўлган, 16 мингга яқин иншоот ёниб кетган ёки шикастланган, 180 минг киши эвакуация қилинганди. Ёнғинлар етказган зарар 250 миллиард долларга баҳоланган.