Янги Орлеандаги теракт ижрочиси ҳужумдан олдин шаҳарга икки марта келган

Луизиана штатининг Янги Орлеан шаҳри марказида янги йил кечаси одамларга қарата машина ҳайдаган шахс 2024 йил октябр ва ноябр ойларида шаҳарга ташриф буюрган ва француз кварталида ақлли кўзойнаклар ёрдамида видео ёзиб олган. Бу ҳақда 5 январ, якшанба куни бўлиб ўтган матбуот анжуманида Федерал тергов бюроси (ФТБ) директори ёрдамчиси ўринбосари Кристофер Райа маълум қилди.

«Терговнинг барча тафсилотлари ва ҳозирда бизда мавжуд бўлган далиллар Жаббор (АҚШ фуқароси Шамсуд Ж.) Янги Орлеанда ёлғиз ўзи ҳаракат қилганини тасдиқлайди», деди Райа. «Биз Қўшма Штатларда шерик борлигини кўрмадик, аммо АҚШда ва хорижда эҳтимолий шерикларни қидиришда давом этамиз», — дея унинг сўзларидан иқтибос келтирган AP ахборот агентлиги.

Шолц: Янги Орлеандаги одамлар кўр-кўрона нафрат туфайли ўлдирилди

Германия канцлери Олаф Шолц ва Европа Иттифоқининг ташқи ишлар ва хавфсизлик сиёсати бўйича янги олий вакили Кая Каллас 1 январ куни Янги Орлеандаги ҳужум муносабати билан ҳамдардлик билдирди.

«Янги Орлеандан даҳшатли хабар: байрамни нишонлаётган бахтли одамлар кўр-кўрона нафрат туфайли ҳалок бўлди ёки яраланди. Биз қурбонларнинг оила аъзолари ва яқинлари билан биргамиз ва жабрланганларнинг барчаси тезроқ соғайиб кетишини тилаймиз», деб ёзган Шолц ижтимоий тармоқда.

«Янги Орлеанда янги йил байрамида қасддан қилинган ҳужумдан чуқур қайғудаман. Бундай зўравонлик учун ҳеч қандай асос йўқ. Расмийлар терговни давом эттирар экан, биз ушбу фожиали даврда қурбонлар ва уларнинг оилалари билан тўлиқ бирдаммиз», — дейди Каллас.