Ливерпулда машина одамларга қарата ҳайдалгани теракт деб ҳисобланмаяпти

Британия полициясига кўра, «Ливерпул» футбол мухлислари устига машина ҳайдалгани «алоҳида ҳодиса» ҳисобланади. У қўлга олинган шахснинг эҳтимолий шерикларини қидирмаяпти.

Фото: Darren Staples/AFP/Getty Images

26 май, душанба куни жамоанинг Англия премер-лигасидаги ғалабасини нишонлаётган «Ливерпул» футбол мухлислари устига машина ҳайдалиб, 27 киши жароҳат олди, бу «якка ҳодиса» бўлиб, терроризм билан боғлиқ эмас. Британия полицияси шу куни кечқурун содир бўлган воқеага шундай баҳо берди.

Мерсисайд полицияси бошлиғи ёрдамчиси констебл Женнифер Симс матбуот анжуманида шундай деди: "Биз бу алоҳида ҳодиса эканлигига ишонамиз ва ҳозирда у билан боғлиқ ҳеч кимни қидирмаяпмиз". Унинг қўшимча қилишича, оломон устига ҳайдаб борилган машина ҳайдовчиси 53 ёшли оқ танли Британия фуқароси бўлиб, воқеадан кўп ўтмай қўлга олинган.

26 май куни кечқурун, полиция маълумотларига кўра, футбол ишқибозларининг чемпионликни нишонлаши чоғида автомобил «пиёдалар қаторига бориб урилган». Воқеа жойида бўлган AFP мухбирининг хабар беришича, у камида тўрт киши замбилда олиб кетилганини кўрган. Кейинчалик маълум бўлишича, ушбу фожиали воқеа муносабати билан 27 кишига шифохонада ёрдам кўрсатилган. Dpa ахборот агентлигининг Британия расмийларига таяниб хабар беришича, камида икки киши, жумладан, бир боланинг жароҳати жиддий деб баҳоланмоқда.

#теракт #Ливерпул