Қозоғистонда енгил моторли самолёт ҳалокатга учради. Қурбонлар бор

Остона яқинидаги аэродром ҳудудида TL-2000 самолёти қулаб тушди. Ҳодиса оқибатида икки нафар экипаж аъзоси ҳалок бўлди.

Қозоғистоннинг Остона шаҳри яқинида енгил моторли TL-2000 самолёти ҳалокатга учради, деб хабар беради «Казинформ».

Қайд этилишича, 22 июн куни соат 11:30 ларда Жоламан аэродроми ҳудудида ўқув-машғулот парвозини амалга ошириш вақтида енгил моторли самолёт иштирокида авиация ҳодисаси содир бўлган. Дастлабки маълумотларга кўра, ҳаво кемаси бортида икки нафар экипаж аъзоси бўлган ва уларнинг иккиси ҳам ҳалок бўлган.

Тергов қилиш қоидаларига мувофиқ, мазкур ҳодиса юзасидан махсус комиссия тузилган.

Қозоғистон Республикаси Транспорт вазирлигининг транспортдаги ҳодисалар ва аварияларни тергов қилиш департаменти ходимлари ҳалокат жойига жалб этилган.

Таъкидланишича, самолёт жисмоний шахсга тегишли. Ҳолат юзасидан жиноят иши қўзғатилган.

Эслатиб ўтамиз, май охирларида Калифорниянинг Сан-Диего шаҳрида Cessna 550 енгил моторли самолёти турар жой даҳасига қулаб тушиб, кенг кўламли ёнғинни юзага келтирган эди.

#авиаҳалокат #Остона #Қозоғистон