YeIdagi STG terminallariga rossiyalik mijozlarga xizmat ko‘rsatish taqiqlanadi

Yevropa Komissiyasi (YeK) suyultirilgan tabiiy gaz (STG)ni qabul qilish uchun Yevropa terminallarini Rossiyadan mijozlarga xizmat ko‘rsatishni taqiqlashga tayyorlanmoqda. Bu haqda 13 iyun, juma kuni kechqurun Yevrokomissiyaning ichki hujjatiga tayanib, Reuters agentligi xabar berdi.

Cheklov 2026 yilning 1 yanvaridan kuchga kirishi mumkin. Rossiyalik mijozlar bilan uzoq muddatli shartnomalar bo‘yicha xizmatlarni to‘xtatish muddati 2027 yilning 31 dekabriga qadar belgilandi, deyiladi 17 iyun kuni rasman e’lon qilinishi kerak bo‘lgan hujjatda.

Bundan tashqari, Yevropa Ittifoqi Yevropa kompaniyalaridan 2027 yil oxirigacha bunday importni to‘liq taqiqlash choralariga tayyorgarlik doirasida Rossiya gazining xaridlari haqidagi ma’lumotlarni oshkor qilishni talab qiladi, deya qayd etadi Reuters. Hujjatning dastlabki tahririga ko‘ra, kompaniyalar bojxona organlariga «import qilingan gazning kelib chiqishi to‘g‘risidagi hujjatlarni» taqdim etishi kerak bo‘ladi. Yevropa Ittifoqi kompaniyalari uchun joriy yil oxirigacha Rossiya eksportchilari bilan yangi bitimlar taqiqlanishi mumkin.

Yevrokomissiya vakili tayyorlanayotgan hujjat tafsilotlariga izoh berishdan bosh tortdi, uning mazmuni hali o‘zgarishi mumkin, deya qayd etadi Reuters.