Zelenskiy Trampning Turkiyadagi uchrashuvda ishtirok etishini qo‘llab-quvvatladi

Ukraina prezidenti Volodimir Zelenskiy AQSh prezidenti Donald Trampning Ukraina va Rossiya delegatsiyalari o‘rtasida 15 may kuni Istanbulda bo‘lib o‘tishi mumkin bo‘lgan to‘g‘ridan to‘g‘ri muzokaralarida qatnashish g‘oyasini to‘g‘ri deb hisoblaydi. «Albatta, Ukrainada hammamiz prezident Tramp biz bilan birga bo‘lishini istardik — Turkiyadagi ushbu uchrashuvda. Bu to‘g‘ri fikr. Biz ko‘p narsani o‘zgartirishimiz mumkin», deb yozdi Zelenskiy 12 may, dushanba kuni kechqurun Telegramʼda.

U avvalroq AQSh prezidentining «to‘liq va so‘zsiz o‘t ochishni to‘xtatish» va Rossiya prezidenti Vladimir Putin bilan to‘g‘ridan to‘g‘ri muzokaralar olib borish haqidagi taklifini qo‘llab-quvvatlaganini eslatdi. «Uchrashuvga tayyor ekanligimni ochiq aytdim. Turkiyada bo‘laman. Ruslar bu uchrashuvdan qochmaydilar, deb umid qilaman», — deya ta’kidladi Ukraina rahbari. Uning so‘zlariga ko‘ra, Ukraina «o‘z tarafidan sukut saqlashga tayyor».

Putin 15 may kuni Turkiyada Ukraina bilan «oldindan hech qanday shartlarsiz» to‘g‘ridan to‘g‘ri muzokaralar o‘tkazishni taklif qilgan, shu bilan birga Yevropa davlatlari va AQShning 30 kunlik sulh e’lon qilish haqidagi chaqiriqlariga e’tibor bermagan. Zelenskiy Istanbulda Putin bilan bevosita muzokaralarga tayyor ekanligini aytdi. «Men Putinni payshanba kuni Turkiyada kutaman. Shaxsan o‘zim. Umid qilamanki, bu safar rossiyaliklar buni qila olmasligiga sabab izlamaydilar», — dedi u avvalroq. Kreml bu xabarga javob bermadi. Ayni paytda Tramp ehtimoliy muzokaralar kuni Istanbulga shaxsan uchib ketishi mumkinligini tan oldi.