Jinoyat ishlari bo‘yicha Xonobod shahar sudi raisi 30 ming dollar bilan ushlandi

Andijon viloyati jinoyat ishlari bo‘yicha Xonobod shahar sudi raisi jinoyat ustida qo‘lga olindi. Bu haqda Kun.uz manbasi xabar berdi.

Manbaga ko‘ra, sud raisi tezkor tadbirda 30 ming AQSh dollari olayotganda ushlangan.

Sudyalar oliy kengashi matbuot xizmati holat yuzasidan rasmiy bayonot berdi.

“Bugun Sudyalar oliy kengashining yig‘ilishi bo‘lib o‘tdi. Unda Bosh prokurorning Andijon viloyati jinoyat ishlari bo‘yicha Xonobod shahar sudi raisi Yu.E.ni Jinoyat kodeksining 168- va 28,211-moddalari tegishli qismi bilan jinoiy javobgarlikka tortishga oid taqdimnomasi muhokama qilindi.

Yakunda kengash xulosasi bilan Yu.E.ni jinoiy javobgarlikka tortishga rozilik berildi va uning sudyalik vakolati to‘xtatildi”, deyiladi kengash bayonotida.

Kengash tergov siri va aybsizlik prezumpsiyasi talablaridan kelib chiqib, boshqa tafsilotlar oshkor qilinmasligini, ijtimoiy tarmoqlardagi aksariyat manbalarda tarqatilayotgan shu mavzudagi xabarlar bo‘rttirilgan bo‘lib, barcha holatlarga tergov yo‘li bilan aniqlik kiritilishini bildirgan.

Ma’lumot uchun, Yunusjon Egamberdiyev 2024 yilning dekabr oyida besh yil muddatga Xonobod shahar sudining raisi lavozimiga tayinlangandi.