O‘zbekiston va Turkmaniston tovar ayirboshlash hajmini 2 mlrd dollarga yetkazishga kelishib oldi

Nashrda ma’lum qilinganidek, Turkman xalqining milliy yetakchisi, Turkmaniston Xalq Maslahati raisi Gurbanguli Berdimuhamedov tashrif bilan O‘zbekistonda bo‘ldi.

"Tashrif davomida O‘zbekiston prezidenti va Turkman xalqining milliy yetakchisi o‘rtasida muzokaralar o‘tkazildi, – deyilgan maqolada. – Unda O‘zbekiston-Turkmaniston do‘stlik, yaxshi qo‘shnichilik va strategik sheriklik munosabatlarini yanada rivojlantirish va mustahkamlashning dolzarb masalalari muhokama qilindi".

Shuningdek, o‘zaro hamkorlikning barcha yo‘nalishlarida, jumladan, siyosiy, parlamentlararo, savdo-iqtisodiy, transport-kommunikatsiya va madaniy-gumanitar sohalarda ko‘p qirrali hamkorlik jadal rivojlanib borayotgani qayd etildi.

Xabar qilinishicha, Hukumatlararo komissiya, Ishbilarmonlar kengashi, Hududlar forumi majlislari, madaniyat kunlari, ko‘rgazmalar va hokazolar muntazam o‘tkazib kelinmoqda. O‘tgan yili o‘zaro tovar ayirboshlash hajmi 1,1 milliard dollarni tashkil etdi.

"Ikki mamlakat poytaxtlarida savdo uylari tashkil etilib, yuk tashish hajmi ortib bormoqda. Yaqin yillarda o‘zaro tovar ayirboshlash hajmini 2 milliard dollarga yetkazish vazifasi qo‘yildi. Bundan tashqari, hamkorlikda "Shovot-Toshhovuz" chegara savdo zonasi tashkil etilmoqda", – deb yozgan "Kazinform".