Ukraina dronlar ishlab chiqarishini maksimal darajada oshirmoqda - Zelenskiy

Ukraina rahbarining so‘zlariga ko‘ra, u bu borada Oliy Bosh qo‘mondon yig‘ilishini o‘tkazgan.

«Eng asosiysi — Ukrainada dronlar ishlab chiqarish borasida hisobotlar tinglandi; ishlab chiqarishni maksimal darajada oshiryapmiz. Bu dronlar turlarining butun turkumi bo‘yicha amalga oshirilyapti: «mavik»lardan tortib uzoq masofali dronlargacha, shuningdek, yerda harakatlanadigan robotlashtirilgan majmualarni ishlab chiqarish imkoniyatlarimizni ham oshiryapmiz», — deya ta’kidladi Ukraina prezidenti.

Zelenskiy ta’kidlashicha, Ukrainaga uchuvchisiz qurilmalarning barcha zarur tarkibiy qismlarini jangchilarga yetkazib berish bo‘yicha ishlab chiqarish va ta’minotda barqaror, doimiy o‘sish kerak. Bu borada joriy yil uchun yaxshi istiqbollar mavjud.

Uning so‘zlariga ko‘ra, Ukrainada alohida ravishda optik tola asosida ishlaydigan dronlar ishlab chiqarilmoqda — bu dronlarga qarshi radioelektron kurash tizimlari samarasiz hisoblanadi.

Joriy yil boshidan beri Ukrainada shunday dronlarning 20 ta yangi, sertifikatlangan namunasi paydo bo‘lgan. Ularni ishlab chiqarishni allaqachon 11 ta ukrain korxonasi o‘zlashtirgan.

Hozirgi asosiy vazifa — imkoni boricha kengroq miqyosda ishlab chiqarish va yetkazib berishga erishish. Zelenskiy ta’kidlashicha, u shartnomalarni maksimal miqdorda tuzish bo‘yicha topshiriq bergan.

«Dipstrayklar (ya’ni, uzoq masofali dronlar) bo‘yicha ham ijobiy dinamika bor: aniq raqamlarni aytolmayman, lekin shu yil oxiriga qadar Mudofaa kuchlarimiz uchun zarur hajmni ta’minlaymiz», — dedi Ukraina prezidenti.