Andijonda masjid tahoratxonasida gaz portladi

Bugun, 31 mart kuni Andijon viloyati Izboskan tumanining Mirzo Ulug‘bek mahallasi hududidagi masjidda portlash yuz berdi.

Favqulodda vaziyatlar vazirligi xabariga ko‘ra, sodir bo‘lgan havo-gaz aralashmasining chaqnashi yuzasidan Andijon viloyati FVBga xabar kelib tushgan.

Xabarga asosan viloyat hokimi, FVB mas’ullari hodisa joyiga yetib borgan. Vaziyat to‘liq nazoratga olingan.

Vazirlikning dastlabki ma’lumotida hodisa oqibatida 6 kishi tan jarohati olgani aytilgandi. Keyinroq berilgan qo‘shimcha ma’lumotda jabrlanuvchilar soni 9 nafarga yetgani ma’lum qilindi.

Ularning barchasi shifoxonada kerakli tibbiy yordam olmoqda.

Favqulodda vaziyatlar vaziri Botir Qudratxo‘jayev ham voqea joyiga jo‘nab ketgan.

Viloyat hokimligining ma’lum qilishcha, portlash tufayli masjid tahoratxonasi qulab tushgan.