Nurotada bog‘cha bolalariga yaroqsiz go‘sht berilayotgani aniqlandi

Tumandagi ayrim maktabgacha ta’lim tashkilotlarida bolalar uchun ajratilgan oziq-ovqat mahsulotlarini saqlash qoidalariga rioya qilinmayotgani, go‘sht mahsulotlarining bir qismi iste’molga yaroqsiz ekani kuzatilgan. Navoiy viloyati hokimi Normat Tursunov tizim mas’ullaridan “halollik va vijdon bilan ishlash” qasamyod xatini yozdirib olish topshirig‘ini bergan edi.

Foto: Iste’molchilar huquqlarini himoya qilish jamiyatlari federatsiyasi

Navoiy viloyatining Nurota tumanidagi bog‘chalarda bolalarga iste’molga yaroqsiz go‘sht berilayotgani aniqlandi. Bu haqda Iste’molchilar huquqlarini himoya qilish jamiyatlari federatsiyasi xabar berdi.

Ma’lum qilinishicha, tumandagi maktab va bog‘chalarda o‘quvchi hamda tarbiyalanuvchilarning sog‘lom ovqatlanishini tashkil etish holati jamoatchilik nazorati tartibida o‘rganilgan. Jarayonda qator kamchiliklarga duch kelingan.

Jumladan, o‘rganishlar natijasida ayrim maktabgacha ta’lim muassasalarida bolalar uchun ajratilgan oziq-ovqat mahsulotlarining saqlanish qoidalariga rioya qilinmayotgani kuzatilgan. Ba’zi bog‘chalarda esa go‘sht mahsulotlarining 4/1 qismi yaroqsiz holatda ekani qayd etilgan.

Federatsiya tumandagi aynan qaysi maktabgacha ta’lim tashkilotida bolalarga iste’molga yaroqsiz go‘sht berilayotganini ochiqlamagan. O‘rganish ishlari davom etayotgani, uning yakunlari va aniqlangan kamchiliklar bo‘yicha tegishli tashkilotlarga ma’lumot taqdim etilishi bildirilgan.

Navoiy viloyati hokimi Normat Tursunov oldinroq viloyatdagi maktabgacha ta’lim tashkilotlari rahbarlari bilan uchrashuv o‘tkazgandi. Viloyat rahbari uchrashuvda bog‘chalardagi kamchiliklarga to‘xtalib, 1 kun muddatda mas’ullardan “halollik va vijdon bilan ishlash” qasamyod xatini yozdirib olish topshirig‘ini bergandi.

#Navoiy viloyati #bog‘cha #bolalar #Nurota